ന്യൂഡല്‍ഹി : വ്യാജ പാസ്‌പോര്‍ട്ടുമായി പടുവൃദ്ധനായി വേഷം മാറിയെത്തി യുവാവ് പിടിയില്‍. ന്യൂയോര്‍ക്കിലേക്ക് പോകാനെത്തിയ അഹമ്മദാബാദ് സ്വദേശി ജയേഷ് പട്ടേല്‍ എന്ന 32 കാരനാണ് പിടിയിലായത്. ഡല്‍ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ വെച്ചായിരുന്നു സംഭവം.
മുടിയും താടിയുമെല്ലാം നരപ്പിച്ച് പടുവൃദ്ധനെന്ന് തോന്നിപ്പിക്കുന്ന തരത്തിലാണ് യുവാവ് വിമാനത്താവളത്തിലെത്തിയത്. വീല്‍ചെയറിലെത്തിയ ഇയാളുടെ കൈവശമുണ്ടായിരുന്ന പാസ്‌പോര്‍ട്ടില്‍ അമ്രിക് സിങ് എന്നാണ് പേര് രേഖപ്പെടുത്തിയിരുന്നത്. 81 വയസ്സുള്ളതായും രേഖപ്പെടുത്തിയിരുന്നു.
പ്രായാധിക്യം മൂലം വീല്‍ചെയറില്‍ നിന്നും എഴുന്നേല്‍ക്കാന്‍ പോലും കഴിയില്ലെന്ന തരത്തിലായിരുന്നു ഇയാളുടെ പെരുമാറ്റം. എന്നാല്‍ ഇയാള്‍ സുരക്ഷാചുമതലയുള്ള ഉദ്യോഗസ്ഥരുടെ നോട്ടത്തില്‍ നിന്നും ഒഴിഞ്ഞുമാറുന്നത് ശ്രദ്ധയില്‍പ്പെട്ടു. ഇയാളുടെ ത്വക്ക് യുവാക്കളുടേതുപോലെ ഇരിക്കുന്നതും സിഐഎസ്എഫ് ഉദ്യോഗസ്ഥരില്‍ സംശയം ജനിപ്പിച്ചു.
തുടര്‍ന്ന് നടത്തിയ വിശദമായ പരിശോധനയിലാണ് ഇയാള്‍ വേഷം മാറി ഉദ്യോഗസ്ഥരെ കബളിപ്പിച്ച് കടക്കാന്‍ എത്തിയതാണെന്ന് വ്യക്തമായത്. ഇയാള്‍ ധരിച്ചിരുന്ന കണ്ണട സീറോ പവര്‍ ഗ്ലാസ്സാണെന്നും പരിശോധനയില്‍ വ്യക്തമായി. തുടര്‍ന്ന് വ്യാജപാസ്‌പോര്‍ട്ടുമായി വേഷം മാറിയെത്തിയതിന് ഇയാളെ സിഐഎസ്എഫ് കസ്റ്റഡിയിലെടുത്ത് പൊലീസിന് കൈമാറി. എന്തിനാണ് ഇയാള്‍ വേഷം മാറി പോകാന്‍ ഒരുങ്ങിയതെന്ന കാര്യവും സുരക്ഷാ ഏജന്‍സികള്‍ അന്വേഷിക്കുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
