അഹമ്മദാബാദ്: പട്ടേല് സംവരണപ്രക്ഷോഭ നേതാവ് ഹാര്ദിക് പട്ടേല് വിവാഹിതനാവുന്നു. കുട്ടിക്കാലത്തെ തന്റെ കളിക്കൂട്ടുകാരിയെയാണ് ഹാര്ദിക് ജീവിതസഖിയാക്കുന്നത്. ജനുവരി 27ന് നടക്കുന്ന വിവാഹചടങ്ങില് കിഞ്ചാല് പരേഖിനെ ഹാര്ദിക് കൂടെകൂട്ടും.
ഇരുകുടുംബങ്ങളിലുമായി അടുത്ത ബന്ധമുളള 100 പരിചയക്കാരെ മാത്രം ഉള്പ്പെടുത്തി ലളിതമായി കല്യാണം നടത്താനാണ് ഹാര്ദിക് ഉദ്ദേശിക്കുന്നത്. ഹാര്ദികിന്റെ കുടുംബ ദേവതയ്ക്ക് മുന്പില് വച്ചാണ് ചടങ്ങ് സംഘടിപ്പിക്കുക. ദിഗ്സാര് ഗ്രാമത്തിലെ മേല്ഡി മാതാ ക്ഷേത്രത്തില് വച്ച് താലിക്കെട്ടാനാണ് ഇരു കുടുംബങ്ങളും തീരുമാനിച്ചിരിക്കുന്നത്.
ഹാര്ദികിനെ പോലെ കിഞ്ചാലും പട്ടേല് സമുദായംഗമാണ്. അഹമ്മദാബാദിലെ വീരാംഗം താലൂക്കിലെ ചന്ദനഗരി ഗ്രാമത്തിലായിരുന്നു ഇരുവരുടെയും കുട്ടിക്കാലം. അന്നുമുതല് ഇരുവര്ക്കും പരസ്പരം അറിയാമെന്ന് ബന്ധുക്കള് പറയുന്നു. കോമേഴ്സ് ബിരുദധാരിയായ കിഞ്ചാല് എല്എല്എബി വിദ്യാര്ത്ഥിനിയാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ