പനാജി: ഗോവയില്‍ പത്താം ക്ലാസ് പരീക്ഷയുടെ ഇംഗ്ലീഷ് ചോദ്യപ്പേപ്പര്‍ വിവാദത്തില്‍. കൈക്കൂലി കൊടുക്കാതെ സംസ്ഥാനത്ത് ജോലി കിട്ടില്ലെന്ന, ചോദ്യപ്പേപ്പറിലെ പരാമര്‍ശത്തിനെതിരെ ഭരണകക്ഷിയായ ബിജെപി തന്നെ രംഗത്തുവന്നു.
കഴിഞ്ഞയാഴ്ച നടത്തിയ എസ്എസ്‌സി പരീക്ഷയുടെ ഇംഗ്ലീഷ് ചോദ്യപ്പേപ്പറിലാണ് വിവാദ ഭാഗം കടന്നുകൂടിയത്. ചോദ്യത്തില്‍ ഉള്‍പ്പെടുത്തിയ, രണ്ടു പേര്‍ തമ്മിലുള്ള സംഭാഷണത്തിലാണ് പരാമര്‍ശം. നാട്ടില്‍ ജോലിയില്ലാത്തതുകൊണ്ട് പോര്‍ട്ടുഗലില്‍ പോകേണ്ടി വന്നെന്നാണ് സംഭാഷണത്തില്‍ പറയുന്നത്. നാട്ടില്‍ ജോലി കിട്ടണമെങ്കില്‍ കൈക്കൂലി കൊടുക്കണമെന്നും തുടര്‍ന്നു പറയുന്നു.
സംസ്ഥാനത്തെ ഭരണകക്ഷിയായ ബിജെപി തന്നെ ചോദ്യത്തിനെതിരെ രംഗത്തുവന്നു. ഇന്ത്യയെയും ഗോവയെയും മോശമായി ചിത്രീകരിക്കുന്നതാണ് ചോദ്യഭാഗമെന്ന് ബിജെപി കുറ്റപ്പെടുത്തി. പോര്‍ട്ടുഗല്‍ പക്ഷപാതികള്‍ ഇപ്പോഴും ഗോവയിലെ ഉദ്യോഗസ്ഥ സംവിധാനത്തില്‍ ഉണ്ട് എന്നതിനു തെളിവാണ് ഇതെന്ന് അവര്‍ പറയുന്നു.
പോര്‍ച്ചുഗീസ് കോളനിയായിരുന്ന ഗോവ 1961ലാണ് ഇന്ത്യന്‍ യൂണിയനില്‍ ചേര്‍ക്കപ്പെട്ടത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
