ന്യൂഡല്ഹി: കോവിഡ് വ്യാപനം തടയുന്നതിനുള്ള ദേശീയ ലോക്ക് ഡൗണിന്റെ അഞ്ചാം ഘട്ടം പതിനൊന്നു നഗരങ്ങള് കേന്ദ്രീകരിച്ചായിരിക്കുമെന്ന് സൂചന. നാലാംഘട്ട ലോക്ക് ഡൗണ് തീരുന്ന ഈ മാസം 31ന് രാഷ്ട്രത്തോടു നടത്തുന്ന പ്രഭാഷണത്തില് പ്രധാനമന്ത്രി നരേന്ദ്ര മോദി ഇതിന്റെ വിശദാംശങ്ങള് പ്രഖ്യാപിക്കും.
ലോക്ക് ഡൗണ് രണ്ടാഴ്ചത്തേക്കു നീട്ടുമെങ്കിലും പതിനൊന്നു നഗരങ്ങളിലായിരിക്കും കൂടുതല് നിയന്ത്രണങ്ങള് എന്നാണ് റിപ്പോര്ട്ടുകള്. ഡല്ഹി, മുംബൈ, ബംഗളൂരു, പൂനെ, താനെ, ഇന്ഡോര്, ചെന്നൈ, അഹമ്മദാബാദ്, ജയ്പുര്, സൂറത്ത്, കൊല്ക്കത്ത എന്നീ നഗരങ്ങളിലായിരിക്കും നിയന്ത്രണങ്ങള്. രാജ്യത്തെ കോവിഡ് ബാധിതരുടെ എഴുപതു ശതമാനവും ഈ നഗരങ്ങളിലാണെന്നാണ് കണക്കുകള്. അഹമ്മദാബാദ്, ഡല്ഹി, പൂനെ, കൊല്ക്കത്ത, മുംബൈ എന്നീ നഗരങ്ങളില്നിന്നു മാത്രമായാണ്, കോവിഡ് കേസുകളില് അറുപതു ശതമാനവും. ഈ നഗരങ്ങളില് കടുത്ത നിയന്ത്രണങ്ങളുണ്ടാവുമെന്നാണ് സൂചന.
പതിനൊന്നു നഗരങ്ങള്ക്കു പുറത്ത് ലോക്ക് ഡൗണില് കൂടുതല് ഇളവുകള് ഉണ്ടാവും. ആരാധനലായങ്ങള് നിബന്ധനകളോടെ തുറക്കും. ഉത്സവങ്ങളോ മറ്റ് ആഘോഷങ്ങളോ നടത്താന് അനുവദിക്കില്ല. മാസ്ക് നിര്ബന്ധമാക്കും. സാമൂഹ്യ അകലം പാലിച്ചുകൊണ്ടായിരിക്കണം ആരാധാന നടത്തേണ്ടത്.
അതേസമയം വിദ്യാഭ്യാസ സ്ഥാപനങ്ങള് തുറക്കാനിടയില്ലെന്നാണ് റിപ്പോര്ട്ടുകള്. സിനിമാ ഹാളുകളും മാളുകളും അടഞ്ഞുതന്നെ കിടക്കും. വിവാഹം, മരണാനന്തര ചടങ്ങുകള് എന്നിവയില് പങ്കെടുന്നവരുടെ എണ്ണത്തിനുള്ള നിയന്ത്രണവും തുടര്ന്നേക്കും.
നാലാംഘട്ട ലോക്ക് ഡൗണ് തീരുന്ന 31ന് പ്രധാനമന്ത്രി നരേന്ദ്ര മോദി റേഡിയോയിലൂടെ രാഷ്ട്രത്തെ അഭിസംബോധന ചെയ്യുന്നുണ്ട്. പ്രതിമാസ പരിപാടിയായ മന്കി ബാത്തിലൂടെയാവും അഞ്ചാം ഘട്ട ലോക്ക് ഡൗണ് പ്രഖ്യാപിക്കുക എന്നാണ് അറിയുന്ന്ത.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ