ലഖ്‌നൗ: അധ്യാപകനെ വെടിവെച്ചു കൊന്നയാളെ ആള്‍ക്കൂട്ടം പൊലീസിന്റെ മുന്നിലിട്ട് തല്ലിക്കൊന്നു. ഉത്തര്‍പ്രദേശിലെ ഖുശിനഗറിലാണ് സംഭവം നടന്നത്. അധ്യാപകനായ സുധീര്‍ സിങ് എന്നയാളെ വെടിവെച്ചു കൊന്നതിന് ശേഷം പുറത്തിറങ്ങിയ പ്രതിയെ തടിച്ചുകൂടിയ ആള്‍ക്കൂട്ടം പൊലീസിന് മുന്നില്‍വെച്ച് മര്‍ദിച്ച് കൊലപ്പെടുത്തുകയായിരുന്നു.
അധ്യാപകനെ വെടിവെച്ചു കൊന്നതിന് ശേഷം ഇയാള്‍ വീടിന് മുകളില്‍ കയറി നിന്ന് വെടിയുതിര്‍ത്തു. പൊലീസ് സ്ഥലത്തെത്തിയപ്പോള്‍ കീഴടങ്ങാനായി താഴെയിറങ്ങിയപ്പോഴാണ് ആള്‍ക്കൂട്ടം ആക്രമിച്ചത്.
ആള്‍ക്കൂട്ടത്തെ പിരിച്ചുവിടാന്‍ പൊലീസ് ശ്രമിച്ചെങ്കിലും നടന്നില്ല. പൊലീസ് വലയത്തില്‍ നിന്നും ഇയാളെ വലിച്ചുമാറ്റിയ ആള്‍ക്കൂട്ടം കല്ലുകളും വടികളുമായി ആക്രമിക്കുകയായിരുന്നു.
ഉറങ്ങിക്കിടന്നപ്പോഴാണ് സുധീര്‍ സിങിനെ അക്രമി മൂന്നുതവണ വെടിവെച്ചത്. സുധീര്‍ സംഭവ സ്ഥലത്തുവെച്ച് തന്നെ മരിച്ചു. പ്രദേശത്ത് സംഘര്‍ഷാവസ്ഥ തുടരുകയാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
