മാസ്‌ക് ഇല്ലാതെ ബൈക്കില്‍ യാത്ര, ചോദ്യം ചെയ്ത പൊലീസുകാരിയെ കടന്നുപിടിച്ചു, യൂണിഫോം വലിച്ചുകീറി; അറസ്റ്റ്
അംറോഹ (യുപി): മാസ്‌ക് ധരിക്കാതെ ബൈക്കില്‍ യാത്ര ചെയ്തതു ചോദ്യം ചെയ്ത വനിതാ പൊലീസിനു നേരെ യുവാവിന്റെ ആക്രമണം. രണ്ടു വനിതാ കോണ്‍സ്റ്റബിളുമാരെ കടന്നുപിടിച്ച യുവാവ് ഒരാളുടെ യൂണിഫോം വലിച്ചുകീറി. ഇയാളെ അറസ്റ്റ് ചെയ്തു.
ഉത്തര്‍പ്രദേശിലെ അംറോഹ ജില്ലയിലാണ് സംഭവം. പക്കിസരായ് മേഖലയില്‍ വച്ച് ബൈക്കില്‍ പോവുകയായിരുന്ന മുഹമ്മദ് സൈദിനെ പൊലീസ് തടഞ്ഞുനിര്‍ത്തുകയായിരുന്നു. സ്ത്രീകളെ ശല്യം ചെയ്യുന്നതു തടയാന്‍ നിയോഗിക്കപ്പെട്ട ആന്റി റോമിയോ സ്‌ക്വാഡിലെ രണ്ടു വനിതാ കോണ്‍സ്റ്റബിളുമാരാണ് ഇയാളെ തടഞ്ഞുനിര്‍ത്തിയത്.
ബൈക്ക് നിര്‍ത്തിയ ഇയാള്‍ കോണ്‍സ്റ്റബിളുമാരോട് മോശമായി പെരുമാറുകയായിരുന്നു. പൊലീസുകാരെ കടന്നുപിടിച്ച ഇയാള്‍ ഒരാളുടെ യൂണിഫോം വലിച്ചുകീറി. രണ്ടു കോണ്‍സ്റ്റബിളുമാരും ചേര്‍ന്ന് മല്‍പ്പിടിത്തത്തിലൂടെ ഇയാളെ കീഴടക്കി. ഇയാള്‍ക്കൊപ്പം ഒരു കുട്ടിയും ബൈക്കില്‍ ഉണ്ടായിരുന്നു.
സ്ത്രീകളോടു മോശമായി പെരുമാറിയതിനും സര്‍ക്കാര്‍ ഉദ്യോഗസ്ഥരുടെ ഡ്യൂട്ടി തടസ്സപ്പെടുത്തിയതിനും സൈദിനെതിരെ കേസ് രജിസ്റ്റര്‍ ചെയ്തതായി പൊലീസ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
