ന്യൂഡല്ഹി: ഡല്ഹിയില് 18 വയസിന് മുകളിലുള്ള എല്ലാവര്ക്കും കോവിഡ് വാക്സിന് സൗജന്യമായി നല്കുമെന്ന് മുഖ്യമന്ത്രി അരവിന്ദ് കെജരിവാള്. രോഗവ്യപാനം വര്ധിക്കുന്ന സാഹചര്യത്തില് വാക്സിന് കുത്തിവെപ്പ് വേഗത്തിലാക്കുമെന്ന് മുഖ്യമന്ത്രി അറിയിച്ചു.
'18 വയസിന് മുകളിലുള്ള എല്ലാവര്ക്കും സൗജന്യ വാക്സിന് നല്കാന് സംസ്ഥാന സര്ക്കാര് തീരുമാനിച്ചു. 1.34 കോടി ഡോസ് വാക്സിന് വാങ്ങാനുള്ള അനുമതി നല്കി കഴിഞ്ഞു. എത്രയും വേഗത്തില് ജനങ്ങള്ക്ക് വാക്സിന് നല്കും' -കെജരിവാള് പറഞ്ഞു.
ഒരേ വാക്സിന് പല വിലയ്ക്കു വില്ക്കാനുള്ള തീരുമാനത്തില്നിന്നു കമ്പനികള് പിന്വാങ്ങണമനെന്ന് കെജരിവാള് ആവശ്യപ്പെട്ടു. രാജ്യത്തുടനീളം വാക്സിന് ഏകീകൃത വില നിശ്ചയിക്കണമെന്നും നിലവിലെ ഉയര്ന്ന വില കുറയ്ക്കാന് വാക്സിന് നിര്മാതാക്കളും കേന്ദ്രസര്ക്കാരും തയ്യാറാകണമെന്നും അദ്ദേഹം ആവശ്യപ്പെട്ടു. ഉയര്ന്ന വില ഈടാക്കി ലാഭമുണ്ടാക്കാനുള്ള സമയമല്ല ഇതെന്നും കെജരിവാള് പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ