ലഖ്‌നൗ: ഉത്തര്‍പ്രദേശ് നിയമസഭാ തെരഞ്ഞെടുപ്പില്‍ മത്സരിക്കുന്ന മുഖ്യമന്ത്രി യോഗി ആദിത്യനാഥ് നാമനിര്‍ദേശ പത്രിക സമര്‍പ്പിച്ചു. കേന്ദ്ര ആഭ്യന്തരമന്ത്രി അമിത് ഷായ്‌ക്കൊപ്പമെത്തിയാണ് നാമനിര്‍ദേശ പത്രിക സമര്‍പ്പിച്ചത്. ഗൊരഖ്പൂര്‍ മണ്ഡലത്തില്‍ നിന്നാണ് യോഗി ജനവിധി തേടുന്നത്. ഭീം ആര്‍മി പാര്‍ട്ടി നേതാവ് ചന്ദ്രശേഖര്‍ ആസാദ് ആണ് പ്രധാന എതിരാളി. തന്റെ രാഷ്ട്രീയ ജീവിതത്തിലെ ആദ്യ നിയമസഭാ തിരഞ്ഞെടുപ്പ് മത്സരമാണ് യോഗിയുടേത്.
ഉത്തര്‍പ്രദേശ് മുഖ്യമന്ത്രിയായി ചുമതലയേല്‍ക്കും മുന്‍പ് ഗൊരഖ്പൂരില്‍ നിന്നുള്ള ലോക്‌സഭാ എം പിയായിരുന്നു യോഗി. അഞ്ച് തവണ ഈ സീറ്റില്‍ നിന്ന് വിജയിച്ച ആത്മവിശ്വാസത്തിലാണ് യോഗി ആദ്യമായി നിയമസഭാ മത്സരത്തിനായി അങ്കം കുറിക്കുന്നത്.
നാമനിര്‍ദേശപത്രികാ സമര്‍പ്പണത്തിന് മുന്‍പായി ഗൊരഖ്‌നാഥ് മഠത്തിലെ മഹന്ത് അവൈദ്യനാഥ് സമാധിയില്‍ എത്തി യോഗി പ്രാര്‍ത്ഥന അര്‍പ്പിച്ചിരുന്നു. ഫെബ്രുവരി 10, 14,20,23,27, മാര്‍ച്ച് മൂന്ന്, ഏഴ് എന്നിങ്ങനെ ഏഴ് ഘട്ടങ്ങളിലായാണ് യു പി നിയമസഭാ തെരഞ്ഞെടുപ്പ് നടക്കുന്നത്. മാര്‍ച്ച് പത്തിന് തെരഞ്ഞെടുപ്പ് ഫലം പുറത്തുവരും.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
