ലക്‌നൗ: ഉത്തര്‍പ്രദേശില്‍ പത്തുവയസ്സുകാരനെ ക്രൂരമായി കൊലപ്പെടുത്തി. കുട്ടിയുടെ ഒരു കണ്ണ് ചൂഴ്‌ന്നെടുത്തതായി പോസ്റ്റ്‌മോര്‍ട്ടം റിപ്പോര്‍ട്ടില്‍ വ്യക്തമാക്കുന്നു.
കാന്‍പൂര്‍ ജില്ലയില്‍ കൃഷിയിടത്തിലാണ് നഗ്നനായ നിലയില്‍ പത്തുവയസ്സുകാരന്റെ മൃതദേഹം കണ്ടെത്തിയത്. പ്രതികള്‍ക്കായി പൊലീസ് അന്വേഷണം നടക്കുന്നതിനിടെയാണ് കുടുംബാംഗങ്ങളെ ഒരേസമയം വേദനിപ്പിച്ചും ഞെട്ടിച്ചും കൊണ്ട് പോസ്റ്റ്‌മോര്‍ട്ടം റിപ്പോര്‍ട്ട് പുറത്തുവന്നത്. കുട്ടിയെ ക്രൂരമായാണ് കൊലപ്പെടുത്തിയതെന്ന് പോസ്റ്റ്‌മോര്‍ട്ടം റിപ്പോര്‍ട്ട് വ്യക്തമാക്കുന്നു.
കുട്ടിയുടെ ഒരു കണ്ണ് ചൂഴ്‌ന്നെടുത്തിട്ടുണ്ട്. രണ്ടാമത്തെ കണ്ണ് മൂന്ന് ഇഞ്ച് നീളമുള്ള ആണി കുത്തിയിറക്കിയ നിലയിലാണ്.ദേഹത്ത് സിഗററ്റ് കൊണ്ട് പൊള്ളിച്ച നിരവധി പാടുകളുണ്ട്. ദേഹത്ത് കാണുന്ന മുറിവേറ്റ പാടുകള്‍ മര്‍ദ്ദിച്ചതിന്റെ ലക്ഷണമാണന്നും പോസ്റ്റ്‌മോര്‍ട്ടം റിപ്പോര്‍ട്ടില്‍ പറയുന്നു.
കഴുത്തില്‍ ഷൂസിട്ട് ചവിട്ടിയതിന്റെ പാടുണ്ട്. ഷൂസിട്ട കാല് കൊണ്ട് ചവിട്ടി കുട്ടിയെ താഴെ വീഴ്ത്തിയതിന്റെ ലക്ഷണങ്ങള്‍ ദേഹത്ത് ഉള്ളതായും പോസ്റ്റ്‌മോര്‍ട്ടം റിപ്പോര്‍ട്ടില്‍ വ്യക്തമാക്കുന്നു. സംഭവത്തിന് പിന്നാലെ പ്രദേശത്തെ നാട്ടുകാര്‍ നടുക്കത്തിലാണ്. കുട്ടികളുടെ സുരക്ഷ ഓര്‍ത്ത് പ്രദേശവാസികള്‍ ആശങ്കയിലാണെന്നാണ് റിപ്പോര്‍ട്ടുകള്‍.
സംഭവസ്ഥലത്ത് നിന്ന്് മദ്യക്കുപ്പിയും ഗ്ലാസുകളും കണ്ടെത്തിയിട്ടുണ്ട്. രണ്ടു അക്രമികളാണ് ഇതിന് പിന്നിലെന്നാണ് പൊലീസിന്റെ പ്രാഥമിക നിഗമനം. സംഭവത്തില്‍ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
