കൊച്ചി: ക്ലാസിക്, മാസ്‌ട്രോ ഡെബിറ്റ് കാര്‍ഡുകള്‍ വഴി എസ്.ബി.ഐ.യുടെ എ.ടി.എമ്മിലൂടെ ബുധനാഴ്ച മുതല്‍ എടുക്കാവുന്നത് 20,000 രൂപ മാത്രം. നിലവിലെ ഒരുദിവസം 40,000 രൂപ വരെ എന്ന പരിധിയാണ് കുറച്ചത്.
ഒരു ദിവസം കൂടുതൽ തുക പിൻവലിക്കാനുള്ളവർ മറ്റു ഡെബിറ്റ് കാർഡ് വേരിയന്‍റുകൾക്ക് അപേക്ഷ സമർപ്പിക്കണം. എസ്ബിഐയുടെ ഗോൾഡ്, പ്ലാറ്റിനം ഡെബിറ്റ് കാർഡുകളുടെ പിൻവലിക്കൽ പരിധിക്ക് മാറ്റം വരുത്തിയിട്ടില്ല. യഥാക്രമം 50,000 രൂപ, ഒരു ലക്ഷം രൂപ ഈ കാർഡ് ഉടമകൾക്ക് ഒരു ദിവസം പിൻവലിക്കാനാകും
എടിഎം ക്ലോണിംഗിലൂടെ വ്യാപകമായി തുക തട്ടുന്നുവെന്ന പരാതിയെത്തുടർന്ന് സെബർ കുറ്റങ്ങൾ ഒഴിവാക്കാനാണ് എസ്ബിഐ ഇത്തരത്തിലൊരു നടപടി സ്വീകരിച്ചത്. കൂടാതെ ഡിജിറ്റൽ ഇടപാടുകൾ പ്രോത്സാഹിപ്പിക്കുകയുമാണ് നടപടിയുടെ ലക്ഷ്യം. ഹോം ബ്രാഞ്ചിൽ അല്ലാതെ നിക്ഷേപിക്കാവുന്ന തുകയുടെ പരിധി എസ്ബിഐ നേരത്തെ നീക്കിയിരുന്നു. മുന്പ് ഹോം ബ്രാഞ്ചിൽ അല്ലാതെ 25,000 രൂപയിൽ കൂടുതൽ നിക്ഷേപിക്കാൻ അക്കൗണ്ട് ഉടമകൾക്ക് അനുമതി ഉണ്ടായിരുന്നില്ല.
നിലവിൽ എസ്ബിഐ തങ്ങളുടെ ഉപയോക്താക്കളുടെ ഡെബിറ്റ് കാർഡുകൾ ചിപ്പ് അധിഷ്ഠിത കാർഡിലേക്ക് അപ്ഗ്രേഡ് ചെയ്തുകൊണ്ടിരിക്കുകയാണ്. കൂടാതെ അക്കൗണ്ടുമായി മൊബൈൽ നന്പർ ബന്ധിപ്പിക്കാത്തവരോട് എത്രയും വേഗം ബന്ധനം നടത്തണമെന്നും എസ്ബിഐ ആവശ്യപ്പെട്ടു. അല്ലാത്തപക്ഷം ഡിസംബർ ഒന്നു മുതൽ ഇന്‍റർനെറ്റ് ബാങ്കിംഗ് സേവനം ലഭിക്കില്ല.
എടിഎമ്മില്‍നിന്ന് പ്രതിദിനം പിന്‍വലിക്കാവുന്ന പണത്തിന്റെ പരിധി വിവിധ ബാങ്കുകള്‍ക്ക് വ്യത്യസ്തമാണ്. അക്കൗണ്ടിന്റെയും ഉപയോഗിക്കുന്ന കാര്‍ഡിന്റെയും പ്രത്യേകതകള്‍ക്കനുസരിച്ച് കൂടുതല്‍ പണം പിന്‍വലിക്കാന്‍ ബാങ്കുകള്‍ അനുവദിക്കുന്നുണ്ട്.
ഐസിഐസിഐ ബാങ്ക്
ബാങ്കിന്റെ പ്ലാറ്റിനം ഐഡന്റിറ്റി ചിപ് കാര്‍ഡ് ഉപയോഗിക്കുന്നവര്‍ക്ക് പ്രതിദിനം ഒരു ലക്ഷം രൂപവരെ പിന്‍വലിക്കാം. വിസ സിഗ്നേച്ചര്‍ ഡെബിറ്റ് കാര്‍ഡ് ഉപയോഗിക്കുന്നവര്‍ക്കാകട്ടെ ഒന്നര ലക്ഷമാണ് പ്രതിദിന പരിധി.
എച്ച്ഡിഎഫ്‌സി ബാങ്ക്
സ്വകാര്യമേഖലയിലെ പ്രമുഖ ബാങ്കായ എച്ച്ഡിഎഫ്‌സി പ്ലാറ്റിനം ചിപ് കാര്‍ഡുള്ളവര്‍ക്ക് പ്രതിദിനം ഒരു ലക്ഷം രൂപവരെ പിന്‍വലിക്കാന്‍ അനുവദിക്കുന്നുണ്ട്.
ആക്‌സിസ് ബാങ്ക്
ബാങ്കിന്റെ റുപെ കാര്‍ഡ് ഉപയോഗിച്ച് പ്രതിദിനം 40,000 രൂപയാണ് പിന്‍വലിക്കാന്‍ കഴിയുക. വിസ ടൈറ്റാനിയം പ്രൈം പ്ലസ് ഡെബിറ്റ് കാര്‍ഡ് ഉപയോഗിച്ച് 50,000 രൂപയും പിന്‍വലിക്കാം.
പിഎന്‍ബി
പ്ലാറ്റിനം, റൂപെ കാര്‍ഡുകള്‍ ഉപയോഗിച്ച് പ്രതിദിനം 50,000 രൂപ പിന്‍വലിക്കാനാണ് പിഎന്‍ബി അനുവദിക്കുന്നത്. ക്ലാസിക് റുപെ, മാസ്റ്റര്‍ ഡെബിറ്റ് എന്നീ കാര്‍ഡുകളുള്ളവര്‍ക്ക് 25,000 രൂപയുമാണ് പരിധി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
