മുംബൈ: പുതുവര്‍ഷത്തില്‍ ചെക്ക് ഇടപാടുകള്‍ കൂടുതല്‍ സുരക്ഷിതമാക്കാന്‍ നടപടികളുമായി പ്രമുഖ പൊതുമേഖല ബാങ്കായ എസ്ബിഐ. പോസിറ്റീവ് പേ സിസ്റ്റം എന്ന പേരില്‍ ചെക്ക് ഇടപാടുകള്‍ കൂടുതല്‍ സുരക്ഷിതമാക്കാനുള്ള സംവിധാനമാണ് എസ്ബിഐ നടപ്പാക്കുന്നത്. ജനുവരി ഒന്നുമുതല്‍ പരിഷ്‌കാരം നിലവില്‍ വരും.
വലിയ തുകയ്ക്കുള്ള ചെക്ക് ഇടപാടുകള്‍ കൂടുതല്‍ സുരക്ഷിതമാക്കാനാണ് എസ്ബിഐ നടപടി സ്വീകരിച്ചത്. 50,000 രൂപയിലധികമുള്ള ചെക്ക് ഇടപാടുകള്‍ക്ക് കൂടുതല്‍ വിവരങ്ങള്‍ ഉപഭോക്താവ് ബാങ്കിന് കൈമാറണം. റിസര്‍വ് ബാങ്കിന്റെ നിര്‍ദേശം അനുസരിച്ചാണ് നടപടി.
അക്കൗണ്ട് നമ്പര്‍, ചെക്ക് നമ്പര്‍, തുക, തീയതി, ആര്‍ക്കാണോ തുക കൈമാറുന്നത് അവരുടെ പേര് എന്നിവ കൈമാറണമെന്നാണ് പുതിയ വ്യവസ്ഥ. 50,000 രൂപയിലധികമുള്ള ഇടപാടുകള്‍ക്കാണ് ഇത് ബാധകമാകുക. എസ്എംഎസ്, മൊബൈല്‍ ആപ്പ്, ഇന്റര്‍നെറ്റ് ബാങ്കിംഗ് തുടങ്ങിയ വഴികളിലൂടെയാണ് വിവരങ്ങള്‍ കൈമാറേണ്ടത്. കൈമാറുന്ന വിവരങ്ങള്‍ ക്രോസ് ചെക്ക് ചെയ്യും. ഇതിന് സംവിധാനം ഒരുക്കിയിട്ടുണ്ട്. അതിന് ശേഷം മാത്രമേ ചെക്ക് നടപടികള്‍ പൂര്‍ത്തിയാവുകയുള്ളൂ.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
