പ്രതിമാസം 259 രൂപയിൽ തുടങ്ങുന്ന 'കലണ്ടർ മൻത് വാലിഡിറ്റി' പ്രീപെയ്ഡ് പ്ലാൻ പ്രഖ്യാപിച്ച് റിലയൻസ് ജിയോ. റീച്ചാർജ് ചെയ്യുന്ന അതേ തീയതിയിൽ തന്നെ അടുത്ത മാസം പ്ലാൻ പുതുക്കാം എന്നതാണ് ഇതിന്റെ സൗകര്യം. കൃത്യമായി പറഞ്ഞാൽ ഈ മാസം 28ന് റീച്ചാർജ് ചെയ്താൽ അടുത്ത മാസം 28നാണ് പ്ലാൻ റീച്ചാർജ് ചെയ്യേണ്ടി വരിക.
ഇതുവഴി കൃത്യം 31 ദിവസം പ്ലാനിന് വാലിഡിറ്റി കിട്ടും. സാധാരണ ജിയോയുടെ പ്രതിമാസ പ്ലാനിന്റെ വാലിഡിറ്റി 28 ദിവസമാണ്. വിഐയും എയർടെലും നൽകുന്ന 299 രൂപയുടെ പ്ലാനിന് 28 ദിവസം മാത്രമേ വാലിഡിറ്റിയുള്ളൂ.
എന്നാൽ കലണ്ടർ മൻത് വാലിഡിറ്റി പ്ലാനിൽ കലണ്ടറിലെ ഒരു മാസം പൂർണമായും വാലിഡിറ്റി ലഭിക്കും. ഒന്നിലധികം പ്ലാനുകൾ ഒരുമിച്ച് റീച്ചാർജ് ചെയ്തു വെക്കാനാവും. ഒരു പ്ലാനിന്റെ വാലിഡിറ്റി കഴിഞ്ഞാൽ അടുത്ത പ്ലാൻ ആക്റ്റിവേറ്റ് ചെയ്യപ്പെടും.
പുതിയ പ്ലാനിൽ പ്രതിദിനം 100 എംഎംഎസ് ലഭിക്കും. പ്രതിദിനം 1.5 ജിബി ഡാറ്റ ഉപയോഗിക്കാം. അൺലിമിറ്റഡ് കോളുകളുണ്ട്. ജിയോ ആപ്പ് സബ്സ്ക്രിപ്ഷനും ലഭിക്കും. 1.5 ജിബി ഡാറ്റ ലഭിക്കുന്ന മറ്റ് പ്ലാനുകൾ 14 ദിവസം വാലിഡിറ്റിയുള്ള 119 രൂപയുടെ പ്ലാൻ, 23 ദിവസം വാലിഡിറ്റിയുള്ള 199 രൂപയുടെ പ്ലാൻ, 28 ദിവസം ലഭിക്കുന്ന 239 രൂപയുടെ പ്ലാൻ എന്നിവയാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ