ഭുവനേശ്വര് : ഓര്ഡര് ചെയ്ത് കാത്തിരുന്ന ഗൃഹോപകരണങ്ങള് എത്തിയ സന്തോഷത്തില് പാഴ്സല് ബോക്സ് തുറന്ന കുടുംബം ഞെട്ടി. ബോക്സിനുള്ളില് വമ്പന് മൂര്ഖന് പാമ്പ്. ഒഡീഷയിലെ റായ്രംഗ്പൂരില് താമസക്കാരനായ വിജയവാഡ സ്വദേശി മുത്തുകുമരനാണ് ഈ അനുഭവമുണ്ടായത്.
എല് ആന്റ് ടി കമ്പനിയില് ജോലിക്കാരനായ മുത്തുകുമരന് മയൂര് ഭഞ്ജ് ജില്ലയിലെ റായ്രംഗ്പൂരില് കമ്പനിയുടെ ക്വാര്ട്ടേഴ്സിലാണ് താമസം. ആന്ധ്രയിലെ വിജയവാഡ സ്വദേശിയായ മുത്തുകുമരന്, ആഗസ്റ്റ് ഒമ്പതിനാണ് ഗുണ്ടൂരില് നിന്നും ഗൃഹോപകരണങ്ങള്ക്കായി ഓര്ഡര് നല്കിയത്.
അഗര്വാള് പാക്കേഴ്സ് ആന്റ് മൂവേഴ്സാണ് പാഴ്സല് എത്തിച്ചത്. ആന്ധ്രയില് നിന്നും ട്രക്ക് വഴിയാണ് സാധനങ്ങള് ഒഡീഷയിലെത്തിച്ചത്. ഗൃഹോപകരണങ്ങള് അടങ്ങിയ പാഴ്സല് ബോക്സിനുള്ളില് എപ്പോഴോ മൂര്ഖന് കടക്കുകയായിരുന്നുവെന്നാണ് നിഗമനം.
പാഴ്സല് ബോക്സ് തുറന്ന മുത്തുകുമരനും കുടുംബവും ഗൃഹോപകരണങ്ങള് അടങ്ങിയ ബോക്സിനുള്ളില് വമ്പനൊരു മൂര്ഖന് പതുങ്ങിയിരിക്കുന്നത് കണ്ട് ഞെട്ടി. നാലടിയോളം നീളമുള്ള മൂര്ഖനായിരുന്നു ബോക്സിനുള്ളില് ഉണ്ടായിരുന്നതെന്ന് മുത്തുകുമരന് പറഞ്ഞു.
ഉടന് തന്നെ മുത്തുകുമരന് റായ് രംഗപൂരിലെ വനംവകുപ്പ് അധികൃതരെ വിവരം അറിയിച്ചു. വനംവകുപ്പിലെ രണ്ട് ഗാര്ഡുമാരെത്തി മൂര്ഖനെ, കുച്ചേബുഡി റിസര്വ് വനത്തില് കൊണ്ടുപോയി തുറന്നുവിട്ടു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ