മണ്ണാര്‍ക്കാട് ചെട്ടിവേലയുടെ ആഘോഷ തിമിര്‍പ്പിനിടെ റോഡിലേക്ക് എത്തിയ ആംബുലന്‍സിന് വഴിയൊരുക്കിയ നാട്ടുകാര്‍ക്ക് അഭിനന്ദനങ്ങളുമായി സോഷ്യല്‍ മീഡിയ.
വേല കാണാനെത്തിയ ആളുകളെക്കൊണ്ട് റോഡ് നിറഞ്ഞിരുന്നു. നടന്ന് പോലും അപ്പുറത്തേക്കോ ഇപ്പുറത്തേക്കോ പോകാന്‍ കഴിയാത്ത അവസ്ഥ. അപ്പോഴാണ് സൈറണ്‍ മുഴക്കി ആംബുലന്‍സ് വരുന്നത് ആളുകള്‍ ശ്രദ്ധച്ചത്. ഉടന്‍ തന്നെ ആഘോഷം നിര്‍ത്തി ആംബുലന്‍സിലുള്ള വഴി നാട്ടുകാരെല്ലാം ചേര്‍ന്ന് ക്ലിയറാക്കുകയായിരുന്നു.
ഒട്ടും വേഗത കുറയ്ക്കാതെ , ബുദ്ധിമുട്ടുകളില്ലാതെ ആംബുലന്‍സ് കടന്നു പോയി. സെക്കന്റുകള്‍ക്കുള്ളില്‍ റോഡ് വീണ്ടും പൂരപ്പറമ്പാകുന്നതും വിഡിയോയില്‍ കാണാം. ആഘോഷങ്ങള്‍ കാണുന്നതിനായി സമീപത്തെ കെട്ടിടത്തിന് മുകളില്‍ കയറി നിന്നവരില്‍ ഒരാളെടുത്ത വിഡിയയാണ് വൈറലാവുന്നത്.
സമൂഹ മാധ്യമങ്ങളില്‍ വൈറലാവുകയാണ് വിഡിയോ. നിരവധിപ്പേരാണ് നാട്ടുകാരെ പ്രശംസിച്ചെത്തിയത്. കേരളത്തിന്റെ മാത്രം പ്രത്യേകതയാണ് ഇതെന്നും രാജ്യത്തിന് മലയാളികള്‍ അഭിമാനമാകുന്നത് ഇങ്ങനെയൊക്കെ കൂടിയാണെന്നും പലരും കമന്റ് ചെയ്തു.
യുപിയിലാണ് ഉത്സവത്തിനിടയില്‍ ആംബുലന്‍സെത്തിയതെങ്കില്‍ ചിലപ്പോള്‍ കത്തിച്ചേനെ എന്നും ചിലര്‍ പറയുന്നു. ജനങ്ങള്‍ ഒറ്റക്കെട്ടാണ് എന്നും മറ്റ് ചിലര്‍ ട്വിറ്റര്‍ കമന്റ് ചെയ്തിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
