ശരീരത്തിൽ ജലാംശം നിലനിർത്താനായി ഇടയ്ക്കിടെ വെള്ളം കുടിക്കേണ്ടതിന്റെ ആവശ്യകതയെക്കുറിച്ച് അറിയാത്തവരായി ആരുമുണ്ടാകില്ല. പക്ഷെ, ഈ ശീലം എത്ര ശ്രമിച്ചിട്ടും കൂടെകൂട്ടാൻ പറ്റാത്തവർ ഒരു വാട്ടർ ബോട്ടിൽ കൈയിൽ കരുതിയാണ് വെള്ളം കുടിക്കുന്നതിനെക്കുറിച്ച് ഓർക്കുന്നത്. ചിലർ അളവ് രേഖപ്പെടുത്തിയ കുപ്പികൾ വരെ വാങ്ങി വെള്ളം കുടിക്കുന്നുണ്ടെന്ന് ഉറപ്പാക്കാറുണ്ട്. ഓരോ ദിവസത്തെയും ഉപയോഗം കഴിയുമ്പോൾ വെള്ളമൊഴിച്ച് ഒന്ന് കഴുകിയെടുക്കുന്നതാണ് പലരുടെയും പതിവ്. പക്ഷെ, ദിവസങ്ങളോളം ഇങ്ങനെ വെള്ളം മാത്രം ഉപയോഗിച്ച് വൃത്തിയാക്കിയാൽ രോഗങ്ങളും കൂടെപ്പോരും. സോപ്പ് ഉപയോഗിച്ച് കഴുകുന്നതിന് പുറമേ വാട്ടർ ബോട്ടിൽ ശരിയായ രീതിയിൽ കഴുകാൻ ഇതാ ചില വഴികൾ.
• ചെറുനാരങ്ങ ഉപയോഗിച്ച് വെള്ളക്കുപ്പി കഴുകാം. കറയും അഴുക്കും ദുർഗന്ധവും നീക്കാൻ പേരുകേട്ട ചെറുനാരങ്ങ ഉപയോഗിച്ച് വാട്ടർ ബോട്ടിൽ വൃത്തിയായി കഴുകിയെടുക്കാം. ചെറുനാരങ്ങാനീരും ഇളംചൂടുവെള്ളവും ചേർത്ത മിശ്രിതം കുപ്പിക്കുള്ളിലൊഴിച്ച് നന്നായി കുലുക്കി കഴുകാം. പിന്നാലെ സോപ്പ് ഉപയോഗിച്ചും കഴുകണം.
• വിനാഗിരിയും കുപ്പി കഴുകാൻ ഉപയോഗിക്കാവുന്നതാണ്. പാത്രങ്ങളിലെ കറയും അഴുക്കും ദുർഗന്ധവുമെല്ലാം അകറ്റാൻ വിനാഗിരിയും വല്ലതാണ്. വിനാഗിരിയും ചൂടുവെള്ളവും ചേർത്ത് കുപ്പിയിലൊഴിച്ചു 5- 10 മിനുറ്റ് ശേഷം നന്നായി കുലുക്കി കഴുകിയെടുക്കാം. ഇതിനുശേഷം കുപ്പി നന്നായി തുടച്ച് ഉണക്കിയെടുക്കണം.
• ബേക്കിംഗ് സോഡ ഉപയോഗിക്കുന്നതാണ് മറ്റൊരു രീതി. മൂന്നോ നാലോ സ്പൂൺ വിനാഗിരി എടുത്ത് അതിലേക്കൽപം ഇളംചൂടുവെള്ളവും ഒരു ടേബിൾ സ്പൂണോളം ബേക്കിംഗ് സോഡയും ചേർത്ത് മിശ്രിതം തയ്യാറാക്കിയശേഷം അൽപനേരം കുപ്പിയിൽ ഒഴിച്ചുവയ്ക്കണം. പിന്നാലെ വെള്ളക്കുപ്പിയുടെ അകവും പുറവും നന്നായി കഴുകി തുടച്ചെടുക്കാം.
പ്രത്യേകം ശ്രദ്ധിക്കണം - പ്ലാസ്റ്റിക് വെള്ളക്കുപ്പികൾ കഴുകുമ്പോൾ ചൂടുവെള്ളം ഒഴിവാക്കി ടാപ്പ് വാട്ടർ ഉപയോഗിക്കാൻ മറക്കരുത്. അതുപോലെ എല്ലാ ആറ് മാസം കൂടുമ്പോഴും വെള്ളക്കുപ്പികൾ മാറ്റുകയും വേണം.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ