ഫെഡറര്‍ക്ക് ഡബിള്‍ ധമാക്ക; മിയാമി ഓപ്പണില്‍ ചാംപ്യനായതിന് പുറമെ എടിപി റാങ്കിങിലും മുന്നേറ്റം

പാരിസ്: മിയാമി ഓപ്പണ്‍ ടെന്നീസില്‍ സ്പാനിഷ് പടക്കുതിര റാഫേല്‍ നദാലിനെ കെട്ടുകെട്ടിച്ച് കിരീടം ചൂടിയ  സ്വിസ് സൂപ്പര്‍ താരം റോജര്‍ ഫെഡറര്‍ എടിപി റാങ്കിങിലും മുന്നേറ്റം. ആറാം സ്ഥാനത്തായിരുന്ന ഫെഡറര്‍ രണ്ട് സ്ഥാനം മെച്ചപ്പെടുത്തി റാങ്കിങില്‍ നാലാം സ്ഥാനത്തേക്ക് കയറി. 
മിയാമി ഓപ്പണ്‍ ഫൈനലില്‍ ചിരവൈരി റാഫേല്‍ നദാലിനെ നേരിട്ടുള്ള സെറ്റുകള്‍ക്കാണ് ഫെഡറര്‍ തകര്‍ത്തത്. 6-3, 6-4 എന്ന സ്‌കോറിനായിരുന്നു സ്വിസ് ഇതിഹാസത്തിന്റെ വിജയം. ജനുവരിയില്‍ നടന്ന ഓസ്‌ട്രേലിയന്‍ ഓപ്പണിലും നദാലിനെ തോല്‍പ്പിച്ച് ഫെഡറര്‍ കിരീടം ചൂടിയിരുന്നു.

തോല്‍വി വഴങ്ങിയെങ്കിലും നദാലും രണ്ട് സ്ഥാനം മെച്ചപ്പെടുത്തി റാങ്കിങില്‍ അഞ്ചാം സ്ഥാനത്തേക്ക് കയറി. എടിപി റാങ്കിങില്‍ 11,960 പോയിന്റുമായി ബ്രിട്ടീഷ് താരം ആന്‍ഡി മുറെയാണ് ഒന്നാം സ്ഥാനത്ത്. സെര്‍ബിയയുടെ നോവാക്ക് ജാക്കോവിച്ച് 7,915 പോയിന്റുമായി രണ്ടാം സ്ഥാനത്തും സ്വിസ് താരം സ്റ്റാന്‍ വാവ്‌റിങ്ക  5,785 പോയിന്റുമായി മൂന്നാം സ്ഥാനത്തുമാണ്. 5,305 (+2) പോയിന്റാണ് നാലാം സ്ഥാനത്തുള്ള ഫെഡറര്‍ക്കുള്ളത്. 4,735 (+2) പോയിന്റുമായി അഞ്ചാം സ്ഥാനത്ത് നദാലുമുണ്ട്. മിലോസ് റോനിയാക്ക് (6), കെയ് നിഷികോരി (7), മാരിന്‍ കിലിക്ക് (8), ഡൊമിനിക്ക് തീം (9), ജോ വില്‍ഫ്രഡ് സോങ്ക (10) എടിപി റാങ്കിലെ ആദ്യ പത്ത് സ്ഥാനക്കാര്‍.