മാന്ത്രികനായ മെസി @ 50; കഴിഞ്ഞ ഒൻപത് വർഷത്തിനിടെ എട്ട് വർഷവും അത് സംഭവിച്ചു

മാഡ്രിഡ്‌: ഹാട്രിക്ക് ​ഗോളുകൾ നേടുകയും രണ്ട് ​ഗോളിന് വഴിയൊരുക്കിയും അർജന്റീന ഇതിഹാസം ലയണൽ മെസി നിറഞ്ഞാടിയപ്പോൾ സ്പാനിഷ് ലാ ലി​ഗയിൽ ബഴ്സലോണ തകർപ്പൻ ജയം സ്വന്തമാക്കി. ലെവാന്റെയെ മറുപടിയില്ലാത്ത അഞ്ച് ​ഗോളുകൾക്ക് തകർത്താണ് ബാഴ്സലോണ വിജയം പിടിച്ചത്. കരിയറിലെ 49ാം ഹാട്രിക്കാണ് മത്സരത്തിൽ മെസി തികച്ചത്. 

മത്സരത്തിൽ ഹാട്രിക്ക് ​ഗോളുകൾ നേടിയ മെസി ഈ സീസണിലെ തന്റെ​ ​ഗോൾ നേട്ടം 50ൽ എത്തിച്ചു. ഈ സീസണിൽ രാജ്യത്തിനും ക്ലബിനുമായി 50 ​ഗോളുകൾ നേടിയ മെസി കഴിഞ്ഞ ഒൻപത് വർഷത്തിനിടെ എട്ട് കൊല്ലവും 50 ​​ഗോളുകൾ എന്ന നേട്ടത്തിലെത്തി. തുടർച്ചയായി അഞ്ചാം വർഷവും ഈ നേട്ടത്തിലെത്താൻ അദ്ദേഹത്തിന് സാധിച്ചു. അതിനിടെ 2013ൽ മാത്രമാണ് 50 ​ഗോളുകൾ തികയ്ക്കാൻ സാധിക്കാതെ പോയത്. 

2010ല്‍ 60 ഗോളുകള്‍ തികച്ചാണ് മെസി തന്റെ പടയോട്ടം തുടങ്ങിയത്. 2011ല്‍ 59 ഗോളുകളും 2012ല്‍ 91 ഗോളുകളും അദ്ദേഹം അടിച്ചുകൂട്ടി. 2013ല്‍ 45 ഗോളുകളാണ് മെസി കണ്ടെത്തിയത്. 14ല്‍ 58ഉം 15ല്‍ 52ഉം 16ല്‍ 59ഉം 17ല്‍ 54ഉം ഗോളുകളാണ് അദ്ദേഹം വലയിലാക്കിയത്.

ലെവാന്റെയ്‌ക്കെതിരെ ലൂയീസ് സുവാരസ് 35ാം മിനുട്ടില്‍ ആദ്യ ഗോള്‍ നേടി. പിന്നാലെ 43, 47, 60 മിനുട്ടുകളിലാണ് മെസി വല ചലിപ്പിച്ചത്. 88ാം മിനുട്ടില്‍ ജെറാര്‍ഡ് പിക്വെ പട്ടിക പൂര്‍ത്തിയാക്കി. സുവാരസ്, പിക്വെ എന്നിവരുടെ ഗോളുകള്‍ക്ക് വഴിയൊരുക്കിയതും മെസി തന്നെ.