മുംബൈ: കഴിഞ്ഞ സീസണിലെ മോശം ഫോം ഇത്തവണയും ഡൽഹി ഡൈനാമോസ് മോശം ഫോം തുടർന്നപ്പോൾ എെഎസ്എൽ പോരാട്ടത്തിൽ സ്വന്തം തട്ടകത്തിൽ മുംബൈ സിറ്റി എഫ്സിക്ക് അനായസ വിജയം. മുംബൈ അരീനയിൽ നടന്ന മത്സരത്തിൽ മുംബൈ സിറ്റി എതിരില്ലാത്ത രണ്ട് ഗോളുകൾക്കാണ് ഡൽഹിയെ പരാജയപ്പെടുത്തിയത്. സീസണിൽ അഞ്ച് മത്സരങ്ങൾ കഴിഞ്ഞിട്ടും ഒരു ജയം പോലുമില്ലാത്ത ഡൽഹി കഴിഞ്ഞ സീസൺ ആവർത്തിക്കുകയാണ്.
കളിയുടെ മുപ്പതാം മിനുട്ടിൽ മൗദു സോഗോ നേടിയ ഗോളിലാണ് മുംബൈ ആദ്യം ലീഡ് എടുത്തത്. ഇസോകോയുടെ മികച്ച ക്രോസിൽ നിന്നായിരുന്നു സോഗോയുടെ ഫിനിഷിങ്. ഇസോകോയും സോഗോയും കളിയിൽ ഉടനീളം ഡൽഹി പ്രതിരോധത്തിന് തലവേദനയായി. രണ്ടാം പകുതിയിൽ ലീഡ് ഉയർത്താൻ മുംബൈക്ക് പെനാൽറ്റിയിലൂടെ അവസരം ലഭിച്ചെങ്കിലും റാഫേൽ ബാസ്റ്റോസിന് ലക്ഷ്യം കാണാനായില്ല.
രണ്ടാം പകുതി പുരോഗമിക്കവേ 77ാം മിനുട്ടിൽ രണ്ടാം ഗോൾ പിറന്നു. അർണോൾഡ് ഇസോകോ ആണ് മുംബൈയുടെ രണ്ടാം ഗോൾ നേടിയത്. കഴിഞ്ഞ മത്സരത്തിൽ വൻ പരാജയം നേരിട്ട മുംബൈക്ക് ഈ മത്സരം ആത്മവിശ്വാസം നൽകുന്നതായി. മുംബൈയുടെ ലീഗിലെ രണ്ടാം ജയമാണിത്. മറുവശത്ത് ഡൽഹിക്ക് അഞ്ച് മത്സരങ്ങൾ കഴിഞ്ഞപ്പോൾ മൂന്ന് പോയിന്റ് മാത്രമെ ഉള്ളൂ. രണ്ടാം ജയത്തോടെ ഏഴ് പോയിന്റുമായി മുംബൈ അഞ്ചാം സ്ഥാനത്തേക്ക് കയറി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ