ടൂറിന്‍: പോര്‍ച്ചുഗല്‍ നായകനും സൂപ്പര്‍ താരവുമായ ക്രിസ്റ്റ്യാനോ റൊണാള്‍ഡോയെ പോലെ തന്നെ അദ്ദേഹത്തിന്റെ മകന്‍ ക്രിസ്റ്റിയാനോ റൊണാള്‍ഡോ ജൂനിയറും പിതാവിന്റെ വഴിയില്‍ തന്നെയാണ്. ചെറിയ പ്രായത്തില്‍ തന്നെ ഫുട്‌ബോള്‍ മികവ് പുലര്‍ത്തുന്ന ജൂനിയര്‍, പിതാവിനൊപ്പം റയല്‍ മാഡ്രിഡില്‍ നിന്ന് യുവന്റസിലേക്ക് ചേക്കേറി. റയലിന്റെ കുട്ടികളുടെ ടീമില്‍ അംഗമായിരുന്ന ജൂനിയര്‍ ക്രിസ്റ്റ്യാനോ ഇപ്പോള്‍ യുവന്റസിന്റെ ജുവനൈല്‍ ടീമായ പള്‍സിനിയുടെ അണ്ടര്‍ 9 ടീമില്‍ അംഗമാണ്.
ഗോള്‍മഴ പെയ്യിച്ച് പള്‍സിനിക്കായുള്ള തന്റെ അരങ്ങേറ്റം അവിസ്മരണീയമാക്കിയാണ് കുഞ്ഞു റോണോ ശ്രദ്ധേയനായത്. പള്‍സിനിയും ലുസെന്റോയും തമ്മിലുള്ള മത്സരത്തിലാണ് റോണോ ജൂനിയര്‍ മിന്നും പ്രകടനം കാഴ്ച വെച്ചത്. ഒന്നും രണ്ടുമല്ല എണ്ണം പറഞ്ഞ നാല് ഗോളുകളാണ് ക്രിസ്റ്റ്യാനോ ജൂനിയര്‍ തന്റെ യുവന്റസ് അരങ്ങേറ്റ മത്സരത്തില്‍ നേടിയത്. മത്സരത്തില്‍ ഒന്നിനെതിരെ ഏഴു ഗോളുകള്‍ക്ക് പള്‍സിനി വിജയിക്കുകയും ചെയ്തു.
സീരി എയിലെ ആദ്യ മൂന്ന് മത്സരങ്ങളും കഴിഞ്ഞ ശേഷവും യുവന്റസിനായി ക്രിസ്റ്റിയാനോയ്ക്ക് വല ചലിപ്പിക്കാന്‍ സാധിക്കാത്തത് വന്‍ ചര്‍ച്ചയായി നില്‍ക്കുമ്പോഴാണ് മകന്റെ മാസ്മരിക പ്രകടനം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
