ന്യൂഡൽഹി: അണ്ടർ 23 എഎഫ്സി ചാമ്പ്യൻഷിപ്പിന്റെ യോഗ്യതാ മത്സരങ്ങൾക്കായുള്ള ഇന്ത്യൻ ഫുട്ബോൾ ടീമിനെ പ്രഖ്യാപിച്ചു. 23അംഗ സംഘത്തെയാണ് ഇന്ന് പരിശീലകൻ ഡെറിക് പെരേര പ്രഖ്യാപിച്ചത്‌. മലയാളികളായ സഹൽ അബ്ദുൽ സമദും രാഹുൽ കെപിയും ടീമിൽ ഇടം സ്വന്തമാക്കിയിട്ടുണ്ട്. ഖത്തറിനെതിരായി സൗഹൃദ മത്സരം കളിച്ച ടീമിൽ ഉണ്ടായിരുന്ന ഭൂരിഭാഗം താരങ്ങളും എഎഫ്സി ചാമ്പ്യൻഷിപ്പിനായുള്ള ടീമിലും ഇടം പിടിച്ചിട്ടുണ്ട്.
ഈ സീസണിൽ കേരള ബ്ലാസ്റ്റേഴ്സിനായി നടത്തിയ തകർപ്പൻ പ്രകടനമാണ് സഹലിനെ ക്യാമ്പിൽ എത്തിച്ചത്. ഐ ലീഗിൽ ഇന്ത്യൻ ആരോസിനായി ഗംഭീര പ്രകടനം കാഴ്ചവെച്ചാണ് രാഹുൽ വരുന്നത്. ദിവസങ്ങൾക്ക് മുൻപാണ് രാഹുൽ കേരള ബ്ലാസ്റ്റേഴ്സുമായി കരാറിലെത്തിയത്. ഇതിന് പിന്നാലെയാണ് ഇന്ത്യൻ ടീമിലെ സ്ഥാനവും.
ഈ മാസം 22 മുതൽ ഉസ്ബെക്കിസ്ഥാനിൽ വെച്ചാണ് ഇന്ത്യയുടെ യോഗ്യതാ മത്സരങ്ങൾ നടക്കുന്നത്. ഇന്ത്യയെ കൂടാതെ ഉസ്ബെക്കിസ്ഥാൻ, തജികിസ്ഥാൻ എന്നിവരാണ് ഗ്രൂപ്പിൽ ഉള്ളത്.
ഗോൾകീപ്പർ- ഗിൽ, ധീരജ്, മൊഹമ്മദ് നവാസ്. പ്രതിരോധം- നരേന്ദർ, മെഹ്താബ്, സർതക്, അൻവർ, ആശിഷ്, നിശു, ഗൗരവ്. മിഡ്ഫീൽഡ്-
വിനീത് റായ്, സഹൽ, ജെറി, ചാങ്തെ, അമർജിത്, രോഹിത്, കോമൽ, രാഹുൽ, അനിരുദ്ധ താപ. ഫോർവേഡ്- ഡാനിയൽ, ലിസ്റ്റൺ, റഹീം, ദാനു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
