ലണ്ടന്: ഇംഗ്ലീഷ് പ്രീമിയര് ലീഗില് കിരീട പോരാട്ടം കനക്കുകയാണ്. രണ്ട് മത്സരങ്ങള് ശേഷിക്കേ 92 പോയിന്റുമായി മാഞ്ചസ്റ്റര് സിറ്റി ഒന്നാമതും 91 പോയിന്റുമായി ലിവര്പപൂള് രണ്ടാം സ്ഥാനത്തും നില്ക്കുന്നു. ഇനിയുള്ള രണ്ട് മത്സരങ്ങള് പ്രീമിയര് ലീഗിലെ പുതിയ ചാമ്പ്യനെ നിര്ണയിക്കും.
മാഞ്ചസ്റ്റര് സിറ്റിയുടെ ഈ സീസണിലെ മുന്നേറ്റത്തിലും നിര്ണായക ശക്തിയായി നില്ക്കുന്നത് അര്ജന്റീന സ്ട്രൈക്കര് സെര്ജിയോ അഗ്യുറോയുടെ മിന്നും ഫോമാണ്. സീസണില് 20 ഗോളുകളാണ് താരം വലയിലാക്കിയത്. കഴിഞ്ഞ എട്ട് വര്ഷമായി ടീമിനൊപ്പമുള്ള താരമായ അഗ്യുറോ നിലവില് സീസണില് ഏറ്റവും കൂടുതല് പ്രീമിയര് ലീഗ് ഗോളുകളെന്ന നേട്ടത്തില് മുന്പന്തിയിലുണ്ട്. 21 ഗോളുകളുമായി ലിവര്പൂള് താരം മുഹമ്മദ് സല ഒന്നാമതും അഗ്യുറോ രണ്ടാം സ്ഥാനത്തും നില്ക്കുന്നു.
സീസണില് 20 ഗോളുകള് തികച്ചതോടെ അഗ്യുറോ ഒരു അപൂര്വ നേട്ടവും സ്വന്തമാക്കി. തുടര്ച്ചയായി അഞ്ച് സീസണുകളില് 20 ഗോളുകളോ അതിലധികോ നേടുന്ന പ്രീമിയര് ലീഗ് ചരിത്രത്തിലെ രണ്ടാമത്തെ താരമെന്ന റെക്കോര്ഡാണ് നേടിയത്. ആഴ്സണല് മുന് ഇതിഹാസം തിയറി ഹെന്റിയുടെ റെക്കോര്ഡിനൊപ്പമാണ് അഗ്യുറോ എത്തിയത്.
2014- 15 സീസണില് 26ഉം 15-16 സീസണില് 24ഉം 16-17 സീസണില് 20 ഗോളുകളും 17-18 സീസണില് 21 ഗോളുകളുമാണ് അഗ്യുറോ വലയിലാക്കിയത്. രണ്ട് മത്സരങ്ങള് കൂടി ശേഷിക്കെ അഗ്യുറോ ഇത്തവണ ഇതുവരെ 20 ഗോളുകളാണ് നേടിയിട്ടുള്ളത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ