ആറാം വട്ടം ബാലന്‍ ഡി ഓര്‍ മെസി കൈകളില്‍ വാങ്ങുന്ന സമയം കാണികള്‍ക്കിടയിലിരുന്ന രണ്ട് പേരുടെ പ്രതികരണങ്ങളാണ് ഫുട്‌ബോള്‍ ലോകത്തെ ഇപ്പോള്‍ കൗതുകത്തിലാക്കുന്നത്. മെസിയുടെ രണ്ട് കുരുന്നുകള്‍ തന്നെ അവര്‍.
പുരസ്‌കാരം ഏറ്റുവാങ്ങാനായി മെസി വേദിയിലേക്ക് കയറിയപ്പോള്‍ സന്തോഷം അടക്കാവാതെ കസേരയിലിരുന്ന് ചാടുകയായിരുന്നു മറ്റെയോ. ബലന്‍ ഡി ഓര്‍ തങ്ങളുടെ ഔദ്യോഗിക ട്വിറ്റര്‍ പേജിലൂടെ മെസിയുടെ കുരുന്നുകളുടെ സന്തോഷം നിറഞ്ഞ നിമിഷങ്ങള്‍ പങ്കുവയ്ക്കുന്നു.
2009ല്‍ ആദ്യമായി ബാലന്‍ ഡി ഓര്‍ ഏറ്റുവാങ്ങിയപ്പോള്‍ എന്റെ മൂന്ന് സഹോദരന്മാരാണ് എനിക്കൊപ്പമുണ്ടായത്. ഇന്ന് എന്റെയൊപ്പം ഭാര്യയും മക്കളുമാണുള്ളത് എന്നാണ് ബാലന്‍ ഡി ഓര്‍ ഏറ്റുവാങ്ങി മെസി പറഞ്ഞത്. 2009, 2010, 2011, 2012, 2015 വര്‍ഷങ്ങളിലാണ് ഇതിന് മുന്‍പ് മെസിയുടെ കൈകളിലേക്ക് ബാലന്‍ ഡി ഓര്‍ എത്തിയത്.
ലാ ലീഗയില്‍ ബാഴ്‌സയെ കിരീടത്തിലേക്ക് എത്തിച്ചതും, സീസണില്‍ 36 ഗോളുമായി തിളങ്ങിയതുമാണ് മെസിയെ തുണച്ചത്. എന്നാല്‍ കോപ്പ അമേരിക്കയിലുള്‍പ്പെടെ ടീമിനെ ജയത്തിലേക്ക് എത്തിക്കാന്‍ മെസിക്കായില്ലെന്നതും വിമര്‍ശകര്‍ ചൂണ്ടിക്കാണിക്കുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
