മുംബൈ : ഇന്ത്യന്‍ ടീമില്‍ നിന്നും സഞ്ജു സാംസണിനെ തഴഞ്ഞതിനെ രൂക്ഷമായി വിമര്‍ശിച്ച് മുന്‍ താരം ഹര്‍ഭജന്‍ സിംഗ്. ഞാന്‍ വിചാരിക്കുന്നത് അവര്‍ ( സെലക്ടര്‍മാര്‍) പരീക്ഷിക്കുന്നത് സഞ്ജുവിന്റെ ഹൃദയത്തെയാണെന്നാണ്. സെലക്ടര്‍മാരായി കരുത്തരായവരാണ് വേണ്ടത്. ബിസിസിഐ പ്രസിഡന്റായ സൗരവ് ഗാംഗുലി വേണ്ടത് ചെയ്യുമെന്നാണ് പ്രതീക്ഷിക്കുന്നതെന്നും ഹര്‍ഭജന്‍ ട്വീറ്റില്‍ കുറിച്ചു.
ബംഗ്ലാദേശിനെതിരായ ഏകദിന പരമ്പരയില്‍ സഞ്ജുവിനെ ഇന്ത്യന്‍ ടീമില്‍ ഉള്‍പ്പെടുത്തിയിരുന്നു. എന്നാല്‍ ഒരു മല്‍സരം പോലും കളിക്കാന്‍ അവസരം നല്‍കാതെയാണ്, വെസ്റ്റിന്‍ഡീസിനെതിരെയുള്ള അടുത്ത പരമ്പരയില്‍ നിന്നും സഞ്ജുവിനെ ഒഴിവാക്കിയത്. സഞ്ജുവിനെ ഇന്ത്യന്‍ ടീമില്‍ നിന്നും തഴഞ്ഞതിനെ വിമര്‍ശിച്ച് തിരുവനന്തപുരം എംപി ശശി തരൂര്‍ നേരത്തെ ട്വീറ്റ് ചെയ്തിരുന്നു.
സഞ്ജുവിനെ തഴഞ്ഞത് നിരാശാജനകമായ നടപടിയായിപ്പോയി. കഴിഞ്ഞ മൂന്ന് ട്വന്റി-20 മല്‍സരങ്ങളില്‍ വെള്ളം കൊടുക്കല്‍കാരന്‍ മാത്രമായി സഞ്ജു. കളിക്കാന്‍ അവസരം പോലും നല്‍കാതെ ഒഴിവാക്കുകയും ചെയ്തു. സെലക്ടര്‍മാര്‍ സഞ്ജുവിന്റെ ബാറ്റിംഗിനെയാണോ, ഹൃദയത്തെയാണോ പരീക്ഷിക്കുന്നത് എന്നായിരുന്നു ട്വീറ്റില്‍ ശശി തരൂര്‍ ചോദിച്ചത്. ഈ ട്വീറ്റ്, റീട്വീറ്റ് ചെയ്തായിരുന്നു ഹര്‍ഭജന്റെ പ്രതികരണം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
