ന്യൂഡല്‍ഹി: ഇന്ത്യന്‍ മുന്‍ ഫുട്‌ബോള്‍ താരം ഐ എം വിജയന്റെ പേര് ഓള്‍ ഇന്ത്യ ഫുട്‌ബോള്‍ ഫെഡറേഷന്‍ പത്മശ്രീ പുരസ്‌കാരത്തിനായി നാമനിര്‍ദേശം ചെയ്തു. രാജ്യാന്തര ഫുട്‌ബോള്‍ ചരിത്രത്തില്‍ ഏറ്റവും വേഗത്തില്‍ ഗോള്‍ വല ചലിപ്പിച്ച വിജയനെ തേടി 2003ല്‍ അര്‍ജുനാ അവാര്‍ഡ് എത്തിയിരുന്നു.
രാജ്യം കണ്ട് എക്കാലത്തേയും മികച്ച മുന്നേറ്റ നിര താരങ്ങളില്‍ ഒരാളായ വിജയന്‍ മൂന്ന് വട്ടം എഐഎഫ്എഫ് പ്ലേയര്‍ ഓഫ് ദി ഇയറായിരുന്നു. 1992നും 2003നും ഇടയില്‍ 79 മത്സരങ്ങളാണ് വിജയന്‍ ഇന്ത്യക്ക് വേണ്ടി കളിച്ചത്. വല കുലുക്കിയത് 40 തവണ. ആ സമയം പോച്ചിങ് സ്‌കില്ലില്‍ എല്ലാവര്‍ക്കും മുന്‍പിലുണ്ടായിരുന്നു ഐഎം വിജയന്‍.
സൗത്ത് ഏഷ്യന്‍ ഫുട്‌ബോള്‍ ഫെഡറേഷന്‍ കപ്പില്‍ ഭൂട്ടാനെതിരെ കളി തുടങ്ങി 12ാമത്തെ സെക്കന്റില്‍ അദ്ദേഹം ഗോള്‍ വല കുലുക്കി. 1999ലെ സൗത്ത് ഏഷ്യന്‍ ഗെയിംസില്‍ പാകിസ്ഥാനെതിരെ ഹാട്രിക് കണ്ടെത്തി. 2006ല്‍ കുപ്പായം അഴിച്ചു. 1992, 1997, 2000 എന്നീ വര്‍ഷങ്ങളില്‍ എഐഎഫ്എഫിന്റെ താരമായി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
