മുംബൈ: രാജസ്ഥാന്‍ റോയല്‍സ് താരം സഞ്ജു സാംസണിന്റെ ഫസ്റ്റ് ക്ലാസ് ക്രിക്കറ്റിലെ ബാറ്റിങ് ശരാശരിയെ വിമര്‍ശിച്ച് കമന്റേറ്റര്‍ സഞ്ജയ് മഞ്ജരേക്കര്‍. ഇന്ത്യന്‍ യുവ താരങ്ങളായ ശുഭ്മാന്‍ ഗില്‍, മായങ്ക് അഗര്‍വാള്‍ എന്നിവരോട് സഞ്ജുവിന്റെ ബാറ്റിങ് ശരാശരി താരതമ്യപ്പെടുത്തിയാണ് മഞ്ജരേക്കറുടെ വിമര്‍ശനം.
73.55 ആണ് ഫസ്റ്റ് ക്ലാസ് ക്രിക്കറ്റില്‍ ശുഭ്മാന്‍ ഗില്ലിന്റെ ബാറ്റിങ് ശരാശരി. മായങ്ക് അഗര്‍വാളിന്റേത് 48.06. സഞ്ജുവിന്റെ ഫസ്റ്റ് ക്ലാസ് ക്രിക്കറ്റിലെ ബാറ്റിങ് ശരാശരി 37.64. ഐപിഎല്ലില്‍ ആദ്യ രണ്ട് കളിയില്‍ മാന്‍ ഓഫ് ദി മാച്ച് ആയതിന് പിന്നാലെ തുടരെ മൂന്ന് കളിയിലും സഞ്ജു നിരാശപ്പെടുത്തിയതോടെയാണ് മലയാളി താരത്തിന് നേരെയുള്ള വിമര്‍ശനങ്ങള്‍ വീണ്ടും ശക്തമാവുന്നത്.
ഏത് ഫോര്‍മാറ്റിലാണ് കളിക്കുന്നത് എങ്കിലും, ഫസ്റ്റ് ക്ലാസ് റെക്കോര്‍ഡുകള്‍ നോക്കിയാല്‍ ഒരു കളിക്കാരനെ കുറിച്ചുള്ള ധാരണ ലഭിക്കും. സഞ്ജുവിന്റെ കാര്യത്തില്‍ എന്നെ എപ്പോഴും അലട്ടിയിരുന്നത് ഫസ്റ്റ് ക്ലാസ് ക്രിക്കറ്റിലെ ബാറ്റിങ് ശരാശരിയാണ്. 21 കളിയില്‍ നിന്ന് അമ്പരപ്പിക്കുന്ന 73 ആണ് ഗില്ലിന്റെ ശരാശരി, മഞ്ജരേക്കര്‍ ട്വിറ്ററില്‍ കുറിച്ചു.
സഞ്ജയ് മഞ്ജരേക്കറുടെ വാദത്തെ പിന്തുണച്ച് ഇന്ത്യന്‍ മുന്‍ ക്രിക്കറ്റ് താരം ദോഡ ഗനേഷുമെത്തി. കരുത്തരായ ടീമുകള്‍ ഇല്ലാത്ത പ്ലേറ്റ് ഗ്രൂപ്പിലാണ് സഞ്ജു തന്റെ ഭൂരിഭാഗം ഫസ്റ്റ് ക്ലാസ് മത്സരങ്ങളും കളിച്ചത്. എന്നിട്ടും സഞ്ജുവിന്റെ ബാറ്റിങ് ശരാശരി വളരെ താഴെ നില്‍ക്കുന്നു, ദേഡ ഗനേഷ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
