ഉദയ്പൂര്: ടെസ്റ്റ് ക്രിക്കറ്റില് ട്രിപ്പിള് സെഞ്ചുറി നേടുന്ന രണ്ടാമത്തെ ഇന്ത്യന് താരമായ കരുണ് നായര് വിവാഹിതനായി. പാതി മലയാളിയായ കരുണ് ദീര്ഘനാളത്തെ പ്രണയത്തിനൊടുവില് ബെംഗളൂരു സ്വദേശിനിയായ സനായ തങ്കരിവാലയെയാണ് മിന്നുചാര്ത്തിയത്.
കരുണിന്റെ ജന്മസ്ഥലമായ രാജസ്ഥാനിലെ ഉദയ്പുരില് നടന്ന വിവാഹച്ചടങ്ങില് ക്രിക്കറ്റ് രംഗത്തെ അടുത്ത സുഹൃത്തുക്കളായ ശ്രേയസ് അയ്യര്, വരുണ് ആരോണ്, ഷാര്ദുല് താക്കൂര്, അജിന്ക്യ രഹാനെ തുടങ്ങിയവര് പങ്കെടുത്തു.
കരുണിന്റെ അച്ഛന് എം.ഡി.കെ.നായര് മാലക്കര സ്വദേശിയും അമ്മ പ്രേമ കെ.നായര് ചെങ്ങന്നൂര് സ്വദേശിനിയുമാണ്. ബെംഗളൂരു സ്വദേശികളായ ജെ.തങ്കരിവാലയുടെയും പരീന് തങ്കരിവാലയുടെയും മകളാണു സനായ.
2016 ഡിസംബറില് ചെപ്പോക്കില് ഇംഗ്ലണ്ടിനെതിരെ ടെസ്റ്റില് ചരിത്രം കുറിച്ച ട്രിപ്പിള് സെഞ്ചുറിയോടെയാണ് (303) കരുണ് ശ്രദ്ധ നേടുന്നത്. ടെസ്റ്റിലെ കന്നി സെഞ്ചുറി തന്നെ ട്രിപ്പിള് സെഞ്ചുറിയിലെത്തിച്ച കരുണ് നൂറും ഇരുനൂറും മുന്നൂറും കടന്നത് ഒരേദിവസമാണെന്ന പ്രത്യേകതയുമുണ്ട്. വലംകയ്യന് ബാറ്റ്സ്മാനായ കരുണ് ഇന്ത്യയ്ക്കു വേണ്ടി ആറു ടെസ്റ്റുകള് കളിച്ചു. ഒരു ട്രിപ്പിള് സെഞ്ചുറി (303*) ഉള്പ്പെടെ 374 റണ്സാണ് ഇതുവരെ നേടിയത്. രണ്ട് ഏകദിനങ്ങളിലും ഇന്ത്യന് ജഴ്സിയണിഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ