ടോക്യോ: പാരാലിംപിക്‌സില്‍ ഇന്ത്യക്ക് മെഡല്‍ ഉറപ്പിച്ച് ഭാവിന പട്ടേല്‍. ടേബിള്‍ ടെന്നീസില്‍ ചൈനീസ് താരത്തെ സെമി ഫൈനലില്‍ തകര്‍ത്ത് ഫൈനലില്‍ കടന്നതോടെയാണ് ഭാവിന മെഡല്‍ ഉറപ്പിച്ചത്. ഞായറാഴ്ച രാവിലെ ഇന്ത്യന്‍ സമയം ഏഴിനാണ് ഫൈനല്‍.
7-11,11-7,11-4,9-11,11-8 എന്ന സ്‌കോറിനാണ് ചൈനയുടെ മിയാവോ സാങ്ങിനെ ഭാവിന തോല്‍പ്പിച്ചത്. പാരാലിംപിക്‌സിലെ ടേബിള്‍ ടെന്നീസില്‍ വെള്ളി മെഡല്‍ ഉറപ്പിക്കുന്ന ആദ്യ താരമാണ് ഭാവിന. ക്വാര്‍ട്ടറില്‍ നിലവിലെ ചാമ്പ്യനായ റാങ്കോവിച്ചിനെ വീഴ്ത്തിയാണ് ടോക്യോ പാരാലിംപിക്‌സിലെ ഇന്ത്യയുടെ ആദ്യത്തെ മെഡല്‍ ഭാവിന ഉറപ്പിച്ചത്.
സെമി ഫൈനലില്‍ ആദ്യ സെറ്റ് 7-11ന് ജയിച്ച് ചൈനീസ് താരമാണ് ആധിപത്യം നേടി തുടങ്ങിയത്. എന്നാല്‍ രണ്ടാം സെറ്റില്‍ ജയം പിടിച്ച് ഭാവിന തിരിച്ചെത്തി. മൂന്നാം സെറ്റും പിടിച്ചതോടെ ഭാവിന മുന്‍തൂക്കം നേടി. നാലാം സെറ്റ് ചൈനീസ് താരം സ്വന്തമാക്കിയെങ്കിലും അഞ്ചാമത്തേതില്‍ ജയം ഉറപ്പിച്ച് ഭാവിന ഫൈനലില്‍ കടന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
