ബാര്ബഡോസ്: വെസ്റ്റ് ഇന്ഡീസ് സംഘത്തിനുള്ളില് കോവിഡ് കേസ് റിപ്പോര്ട്ട് ചെയ്തതോടെ ഓസ്ട്രേലിയക്കെതിരായ രണ്ടാം ഏകദിനം മാറ്റി വെച്ചു. വിന്ഡിസ് ടീം സ്റ്റാഫിനാണ് കോവിഡ് സ്ഥിരീകരിച്ചത്.
രണ്ടാം ഏകദിനത്തിലെ ആദ്യ പന്ത് എറിയുന്നതിന് മിനിറ്റുകള് മാത്രം മുന്പാണ് മത്സരം മാറ്റിവെച്ചത്. ടോസ് കഴിഞ്ഞതിന് പിന്നാലെ മത്സരം മാറ്റിവെക്കുന്നതായി സ്ഥിരീകരണം എത്തി. ഇതോടെ ഇരു ടീമും അവരുടെ ഡ്രസിങ് റൂമിലേക്ക് മടങ്ങി.
ടീം ഹോട്ടലില് വ്യത്യസ്ത നിലകളിലാണ് വിന്ഡിസ്, ഓസീസ് ടീമുകള് കഴിയുന്നത്. എന്നാല് സെന്റ് ലൂസിയയില് നിന്ന് ബാര്ബഡോസിലേക്കുള്ള യാത്രയില് ഇരു ടീമും ഒരു വിമാനത്തിലായിരുന്നു. നിലവില് ക്വാറന്റൈനിലുള്ളവരുടെയെല്ലാം പരിശോധനാ ഫലം വന്നതിന് ശേഷമാവും രണ്ടാം ഏകദിനം എപ്പോഴെന്ന തീരുമാനം എടുക്കുക.
ഞായറാഴ്ച നടക്കേണ്ട മൂന്നാം ഏകദിനവും മാറ്റി വയ്ക്കേണ്ടി വന്നേക്കുമെന്ന് ക്രിക്കറ്റ് ഓസ്ട്രേലിയ പ്രതികരിച്ചു. രണ്ടാം ഏകദിനം ഉപേക്ഷിച്ചതോടെ ഓസ്ട്രേലിയയുടെ റിലേ മെറിഡിത്തിനാണ് വലിയ തിരിച്ചടിയായത്. മെറിഡിത്തിന്റെ അരങ്ങേറ്റ മത്സരമാവേണ്ടിയിരുന്നതാണ് ഇത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ