ബൗണ്ടറി തടയുന്നതിന് ഇടയിൽ കൂട്ടിയിടി; ഫാഫ് ഡുപ്ലസിസിനെ ആശുപത്രിയിൽ പ്രവേശിപ്പിച്ചു
അബുദാബി: പാകിസ്ഥാൻ സൂപ്പർ ലീഗ് മത്സരത്തിന് ഇടയിൽ സഹതാരവുമായി കൂട്ടിയിടിച്ച ഖ്വാട്ട ഗ്ലാഡിയേറ്റേഴ്സിന്റെ സൗത്ത് ആഫ്രിക്കൻ താരം ഫാപ് ഡുപ്ലസിസിനെ ആശുപത്രിയിൽ പ്രവേശിപ്പിച്ചു. പെഷ്വാർ സൽമിക്കെതിരായ മത്സരത്തിന്റെ ഏഴാം ഓവറിലാണ് സംഭവം. കൂടുതൽ പരിശോധനകൾ നടത്തുന്നതിനായാണ് ഡുപ്ലസിസിനെ ആശുപത്രിയിലേക്ക് കൊണ്ടുപോയത്.
ബൗണ്ടറി സേവ് ചെയ്യുന്നതിനായി ബൗണ്ടറി ലൈനിന് സമീപം ഡൈവ് ചെയ്യുകയായിരുന്നു ഡുപ്ലസിസ്. ഈ സമയം ഡുപ്ലസിസിന്റെ തല സഹതാരം മുഹമ്മദ് ഹസ്നയിന്റെ കാലിൽ ഇടിച്ചു. ലോങ് ഓണിൽ നിന്നും ലോങ് ഓഫിൽ നിന്നും ബൗണ്ടറി തടയാൻ ഓടിയെത്തുകയായിരുന്നു ഇരു താരങ്ങളും.
ഗ്രൗണ്ടിൽ വെച്ച് തന്നെ ഡുപ്ലസിസിനെ ടീം ഫിസിയോ പരിശോധിച്ചു. പിന്നാലെ ഡഗൗട്ടിലേക്ക് മടങ്ങിയ ഡുപ്ലസിസിനെ കൂടുതൽ പരിശോധനകൾക്കായി ആശുപത്രിയിലേക്ക് മാറ്റുകയായിരുന്നു. സയിം അയൂബിനെ ഡുപ്ലസിസിന് പകരം കൺകഷൻ സബ്സ്റ്റിറ്റ്യൂട്ടായി ഇറക്കി. തുടർച്ചയായ രണ്ടാം മത്സരത്തിലാണ് ഗ്ലാഡിയേറ്റേഴ്സ് താരം പരിക്കിലേക്ക് വീഴുന്നത്. കഴിഞ്ഞ കളിയിൽ റസലിന്റെ ഹെൽമറ്റിൽ പന്ത് കൊണ്ടതോടെ ഗ്ലാഡിയേറ്റേഴ്സിന് കൺകഷൻ സബ്സ്റ്റിറ്റ്യൂട്ടിനെ ഇറക്കേണ്ടി വന്നിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ