ടൂറിൻ: ഇറ്റലിയിലും തന്റെ നേട്ടങ്ങളുടെ പട്ടിക നിറച്ച് യുവന്റ്സ് സൂപ്പർ താരം ക്രിസ്റ്റ്യാനോ റൊണാൾഡോ. യുവന്റ്സിനായുള്ള തന്റെ ഗോൾ വേട്ട ക്രിസ്റ്റ്യാനോ 100 കടത്തി. അതിവേഗത്തിൽ യുവന്റ്സിനായി 100 ഗോൾ തികയ്ക്കുന്ന താരം എന്ന നേട്ടവും ഇവിടെ ക്രിസ്റ്റ്യാനോ തന്റെ പേരിലാക്കി.
സിരി എയിലെ സസ്സുവോളോയ്ക്കെതിരായ കളിയിൽ 45ാം മിനിറ്റിൽ ഗോൾ വല കുലുക്കിയാണ് ക്രിസ്റ്റ്യാനോ 100 തികച്ചത്. 131 കളിയിൽ നിന്നാണ് ക്രിസ്റ്റ്യാനോയുടെ 100 ഗോൾ നേട്ടം. മൂന്ന് സീസൺ മാത്രം കളിച്ച് 100 ഗോൾ കണ്ടെത്തുന്ന ആദ്യ യുവന്റ്സ് താരവുമായി ക്രിസ്റ്റ്യാനോ ഇവിടെ. ഒമർ സ്വോരി, റോബർട്ടോ ബാഗിയോ എന്നിവർക്ക് 5 സീസണുകളാണ് യുവന്റ്സിന് വേണ്ടി 100 ഗോളിലേക്ക് എത്താൻ വേണ്ടി വന്നത്.
2018-19 സീസണിലാണ് ക്രിസ്റ്റ്യാനോ യുവന്റ്സിലേക്ക് എത്തിയത്. യുവന്റ്സിനൊപ്പമുള്ള ആദ്യ സീസണിൽ ക്രിസ്റ്റ്യാനോ നേടിയത് 28 ഗോളുകൾ. തൊട്ടടുത്ത സീസണിൽ ഗോൾ നേട്ടം 37ലേക്ക് എത്തി. ഈ സീസണിൽ ഇതുവരെ 35 തവണ ക്രിസ്റ്റ്യാനോ ഗോൾ വല കുലുക്കി കഴിഞ്ഞു.
ദേശിയ ടീമിനായും മൂന്ന് വ്യത്യസ്ത ക്ലബുകൾക്കായും 100 ഗോൾ നേടുന്ന ഒരേയൊരു താരമാണ് ക്രിസ്റ്റ്യാനോ. റയലിനും മാഞ്ചസ്റ്റർ യുനൈറ്റഡിനും വേണ്ടി ക്രിസ്റ്റ്യാനോ 100ന് മുകളിൽ ഗോൾ കണ്ടെത്തിയാണ് യുവന്റ്സിലേക്ക് എത്തിയത്. എന്നാൽ ചാമ്പ്യൻസ് ലീഗിലെ തോൽവിയും യൂറോപ്പ ലീഗിലെ തിരിച്ചടിയും ക്രിസ്റ്റ്യാനോയുടെ ടൂറിനിലെ തുടരലിന് ആശങ്കയാവുന്നുണ്ട്. ചാമ്പ്യൻസ് ലീഗിലേക്ക് യോഗ്യത നേടാൻ കഴിഞ്ഞില്ലെങ്കിൽ ക്രിസ്റ്റ്യാനോ യുവന്റ്സ് വിട്ടേക്കുമെന്നാണ് റിപ്പോർട്ടുകൾ.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ