ചരിത്രമെഴുതി ഇന്ത്യന്‍ പുരുഷ റിലേ ടീം; ഏഷ്യന്‍ റെക്കോര്‍ഡ് തകര്‍ത്തു, ലോക അത്‌ലറ്റിക്‌സില്‍ കന്നി ഫൈനല്‍ പ്രവേശം (വീഡിയോ)

ബുഡാപെസ്റ്റ്: ലോക അത്‌ലറ്റിക്‌സ് ചാമ്പ്യന്‍ഷിപ്പില്‍ ചരിത്രമെഴുതി മലയാളികള്‍ ഉള്‍പ്പെട്ട ഇന്ത്യന്‍ പുരുഷ റിലേ ടീം. 4- 400 മീറ്റര്‍ റിലേയില്‍ ചരിത്രത്തിലാദ്യമായി ഇന്ത്യന്‍ റിലേ ടീം ഫൈനലിലേക്ക് യോഗ്യത നേടി. ഏഷ്യന്‍ റെക്കോര്‍ഡ് തകര്‍ത്താണ് ടീമിന്റെ മുന്നേറ്റം എന്നതും ഇരട്ടി മധുരമായി. 

അമോജ് ജേക്കബ്, രാജേഷ് രമേഷ്, മലയാളി താരങ്ങളായ അനസ് യഹിയ, മുഹമ്മദ് അജ്മല്‍ വരിയത്തൊടി എന്നിവരടങ്ങിയ ടീമാണ് ഫൈനലിലേക്ക് മുന്നേറിയത്. രണ്ട് മിനിറ്റ് 59.05 സെക്കന്‍ഡിലാണ് ഇന്ത്യന്‍ സംഘം ഫിനിഷ് ചെയ്തത്. 3.00.25 ആയിരുന്നു ടീമിന്റെ നേരത്തെയുള്ള മികച്ച സമയം. 

പിന്നില്‍ നിന്നു ഓടിക്കയറിയാണ് ഇന്ത്യന്‍ സംഘത്തിന്റെ കുതിപ്പ്. യുഎസ്എയ്ക്ക് പിന്നില്‍ രണ്ടാം സ്ഥാനത്താണ് ഹീറ്റ്‌സില്‍ ഇന്ത്യന്‍ സംഘം മത്സരം പൂര്‍ത്തിയാക്കിയത്. ബ്രിട്ടന്‍, ജമൈക്ക ടീമുകളെ പിന്തള്ളിയാണ് ഇന്ത്യന്‍ ടീം കുതിച്ചത്.

ഈ വാര്‍ത്ത കൂടി വായിക്കൂ 

ലോക ബാഡ്മിന്റന്‍ ചാമ്പ്യന്‍ഷിപ്പില്‍ എച്ച് എസ് പ്രണോയ്ക്ക് വെങ്കലം; കേരളത്തിന് അഭിമാനം 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ