ലണ്ടന്‍: മുഹമ്മദ് സല പ്രീമിയര്‍ ലീഗിലെ ശ്രദ്ധേയ നേട്ടം സ്വന്തമാക്കിയ രാവില്‍ തകര്‍പ്പന്‍ ജയവുമായി ലിവര്‍പൂള്‍. ജയത്തോടെ അവര്‍ പ്രീമിയര്‍ ലീഗില്‍ ഒന്നാം സ്ഥാനത്തേക്ക് കയറുകയും ചെയ്തു. ക്രിസ്റ്റല്‍ പാലസിനെ 1-2നു പരാജയപ്പെടുത്തിയാണ് അവര്‍ വിജയവും ഒന്നാം സ്ഥാനവും സ്വന്തമാക്കിയത്.
മത്സരത്തില്‍ ടീമിനെ സമനിലയില്‍ എത്തിച്ച ഗോള്‍ സ്വന്തമാക്കി സല ലിവര്‍പൂളിനായി 200 ഗോളുകളെന്ന നേട്ടവും സ്വന്തമാക്കി. പ്രീമിയർ ലീഗിലെ താരത്തിന്റെ ഗോൾ നേട്ടം 150ലും എത്തി.
മത്സരത്തിന്റെ ആദ്യ പകുതി ഗോള്‍ രഹിതമായിരുന്നു. രണ്ടാം പകുതിയില്‍ ലിവര്‍പൂളിനെ ഞെട്ടിച്ച് ക്രിസ്റ്റല്‍ പാലസ് ലീഡെടുക്കുകയായിരുന്നു.
കിട്ടിയ പെനാല്‍റ്റി വലയിലാക്കി ജീന്‍ ഫിലിപ്പ് മറ്റെറ്റയാണ് ക്രിസ്റ്റല്‍ പാലസിനെ മുന്നിലെത്തിച്ചത്. 57ാം മിനിറ്റിലായിരുന്നു ഈ ഗോൾ. 75ാം മിനിറ്റില്‍ ക്രിസ്റ്റല്‍ താരം ജോര്‍ദാന്‍ അയേവ് ചുവപ്പ് കാര്‍ഡ് കണ്ടതോടെ അവര്‍ പത്ത് പേരായി ചുരുങ്ങി.
പിന്നീടാണ് ലിവര്‍പൂളിന്റെ തിരിച്ചു വരവ് കണ്ടത്. 76ാം മിനിറ്റില്‍ മുഹമ്മദ് സല ടീമിനു സമനില സമ്മാനിച്ചു. ഇഞ്ച്വറി ടൈമിലേക്ക് കടന്നപ്പോള്‍ മത്സരം സമനിലയില്‍ അവസാനിക്കുമെന്നു പ്രതീക്ഷിച്ചു. എന്നാല്‍ ഹാര്‍വി ഇലിയറ്റിന്റെ ഗോള്‍ ലിവര്‍പൂളിനു നിര്‍ണായക ജയം സമ്മാനിക്കുകയായിരുന്നു.
ഈ വാർത്ത കൂടി വായിക്കൂ
സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
