മുംബൈ: ഇംഗ്ലണ്ട് വനിതാ ടീമിനെതിരായ ഏക ടെസ്റ്റില് പിടിമുറുക്കി ഇന്ത്യന് വനിതകള്. ഒന്നാം ഇന്നിങ്സില് 428 റണ്സെന്ന കൂറ്റന് സ്കോര് പടുത്തുയര്ത്തിയ ഇന്ത്യ ഇംഗ്ലണ്ടിനെ വെറും 136 റണ്സിനു ഓള് ഔട്ടാക്കി.
292 റണ്സ് ഒന്നാം ഇന്നിങ്സ് ലീഡുമായി രണ്ടാം ഇന്നിങ്സ് തുടങ്ങിയ ഇന്ത്യ നിലവില് വിക്കറ്റ് നഷ്ടമില്ലാതെ 48 റണ്സെന്ന നിലയില്. 20 റണ്സുമായി ഷെഫാലി വര്മയും 24 റണ്സുമായി സ്മൃതി മന്ധാനയും ക്രീസില്. ഇന്ത്യക്ക് നിലവില് 340 റണ്സ് ലീഡ്.
അഞ്ച് വിക്കറ്റുകള് പിഴുത ദീപ്തി ശര്മയുടെ മികവാണ് ഇംഗ്ലണ്ടിന്റെ നടുവൊടിച്ചത്. 59 റണ്സെടുത്ത നാറ്റ് സീവര് മാത്രമാണ് ചെറുത്തു നിന്നത്. മറ്റൊരാള്ക്കും കാര്യമായി തിളങ്ങാനായില്ല.
5.3 ഓവറില് വെറും ഏഴ് റണ്സ് മാത്രം വഴങ്ങിയാണ് ദീപ്തി അഞ്ച് വിക്കറ്റുകള് പിഴുതത്. നാലോവറുകള് മെയ്ഡനായിരുന്നു. സ്നേഹ് റാണ രണ്ട് വിക്കറ്റുകള് സ്വന്തമാക്കി. രേണുക സിങ്, പൂജ വസ്ത്രാകര് എന്നിവര് ഓരോ വിക്കറ്റും സ്വന്തമാക്കി.
നേരത്തെ സതീഷ് ശുഭ (69), ജെമിമ റോഡ്രിഗസ് (68), യസ്തിക ഭാട്ടിയ (66), ദീപ്തി ശര്മ (67) എന്നിവരുടെ അര്ധ സെഞ്ച്വറികളാണ് ഇന്ത്യക്ക് മികച്ച സ്കോര് സമ്മാനിച്ചത്. ക്യാപ്റ്റന് ഹര്മന്പ്രീത് കൗറും (49) തിളങ്ങി.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ