കൊളംബോ: ലോകകപ്പിലെ ദയനീയ പ്രകടനത്തിന് പിന്നാലെ പുറത്താക്കിയ ശ്രീലങ്കന് ക്രിക്കറ്റ് ബോര്ഡ് പുനഃസ്ഥാപിച്ചു. കോടതി ഉത്തരവിനെ തുടര്ന്നാണ് പുറത്താക്കിയ നടപടി മരവിപ്പിച്ച് പഴയ ബോര്ഡ് അംഗങ്ങളെ തന്നെ വീണ്ടും നിയമിച്ചത്.
ലോകകപ്പിലെ തോല്വിക്ക് പിന്നാലെ ശ്രീലങ്കന് കായിക മന്ത്രി റോഷന് രണസിംഗെയാണ് നടപടിയെടുത്തത്. ഇന്ത്യയോട് 302 റണ്സിന്റെ ദയനീയ തോല്വി ഏറ്റുവാങ്ങിയതിന് പിന്നാലെയാണ് നടപടി. ലങ്കന് ക്രിക്കറ്റ് ബോര്ഡ് പിരിച്ചു വിട്ട സര്ക്കാര്, മുന് നായകന് അര്ജുന രണതുംഗെയുടെ നേതൃത്വത്തില് ഇടക്കാല ഭരണസമിതിയെയും നിയോഗിച്ചിരുന്നു.
എന്നാല് ഇതിനെതിരെ ബോര്ഡ് പ്രസിഡന്റ് ഷമ്മി സില്വ കോടതിയെ സമീപിക്കുകയായിരുന്നു. സില്വ നല്കിയ ഹര്ജി പരിഗണിച്ചാണ് കോടതി സര്ക്കാര് നടപടി റദ്ദാക്കി പഴയ ബോര്ഡ് പുനഃസ്ഥാപിച്ചത്.
ബോര്ഡിന്റെ പുനഃസ്ഥാപനം രണ്ടാഴ്ചയിലേക്കാണ് കോടതി നിര്ദ്ദേശിച്ചിട്ടുള്ളത്. ശേഷം കേസ് വീണ്ടും പരിഗണിക്കുമെന്നു കോടതി വ്യക്തമാക്കി.
ഇന്ത്യയ്ക്കെതിരായ തോല്വിക്ക് പിന്നാലെയാണ് ശ്രീലങ്കന് ക്രിക്കറ്റ് ഭാരവാഹികളോട് ഉത്തരവാദിത്തം ഏറ്റെടുത്ത് രാജി വെക്കാന് ലങ്കന് കായിക മന്ത്രി നിര്ദേശം നല്കിയത്. രാജിവെച്ചില്ലെങ്കില് പുറത്താക്കുമെന്നും മുന്നറിയിപ്പ് നല്കിയിരുന്നു. പിന്നാലെയായിരുന്നു നടപടി.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ