ന്യൂഡല്ഹി: ടെസ്റ്റ് ക്രിക്കറ്റില് നിന്ന് വിട്ടുനില്ക്കുന്ന ഇന്ത്യന് താരം വിരാട് കോഹ്ലിയുടെ വ്യക്തി ജീവിതവുമായി ബന്ധപ്പെട്ട് വിവരങ്ങള് പങ്കുവെച്ചതില് ക്ഷമാപണം നടത്തി ദക്ഷിണാഫ്രിക്കന് ഇതിഹാസം എബി ഡിവില്ല്യേഴ്സ്. തെറ്റു സംഭവിച്ചതായി താരം നേരത്തെ തന്നെ വ്യക്തമാക്കിയിരുന്നു. പിന്നാലെയാണ് ഇപ്പോള് ക്ഷമാപണം നടത്തി രംഗത്തെത്തിയത്.
യുട്യൂബ് ചാനല് വഴി തന്നെയാണ് താരത്തിന്റെ ക്ഷമ പറച്ചില്. കോഹ്ലിയുടെ സ്വകാര്യത മാനിക്കണമെന്നും ഡിവില്ല്യേഴ്സ് ആരാധകരോട് അഭ്യര്ഥിച്ചു.
'എന്റെ മുന് ഷോയില് എനിക്കൊരു തെറ്റു സംഭവിച്ചു. സ്ഥിരീകരിക്കാത്ത കാര്യങ്ങളാണ് ഞാന് പറഞ്ഞത്. അക്കാര്യത്തില് ഞാന് കോഹ്ലിയോടും കുടുംബത്തോടും ക്ഷമ ചോദിക്കുന്നു. കുടുംബം വളരെ പ്രധാനപ്പെട്ടതാണ്. കോഹ്ലിയുടെ സ്വകാര്യതയെ ബഹുമാനിക്കണമെന്നു ആരാധകരോടു അഭ്യര്ഥിക്കുന്നു'- ഡിവില്ല്യേഴ്സ് വ്യക്തമാക്കി.
വിരാട് കോഹ്ലിയും നടിയും ഭാര്യയുമായ അനുഷ്ക ശര്മയും തങ്ങളുടെ രണ്ടാമത്തെ കുഞ്ഞിനായി കാത്തിരിക്കുകയാണെന്നും അതുകൊണ്ടാണ് ഇംഗ്ലണ്ടിനെതിരായ ആദ്യ രണ്ട് ടെസ്റ്റില് നിന്ന് ഇന്ത്യന് താരം വിട്ടുനില്ക്കുന്നത് എന്നുമായിരുന്നു ദിവസങ്ങള്ക്ക് മുന്പുള്ള ഡിവില്ല്യേഴ്സിന്റെ വെളിപ്പെടുത്തല്. തന്റെ യുട്യൂബ് ചാനലിലൂടെയായിരുന്നു കോഹ്ലിയുടെ വ്യക്തിപരമായ കാര്യത്തില് ഡിവില്ല്യേഴ്സ് അഭിപ്രായം പറഞ്ഞത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ