രാജ്‌കോട്ട്: ടെസ്റ്റ് ക്രിക്കറ്റില്‍ 500 വിക്കറ്റുകള്‍ വീഴ്ത്തുന്ന രണ്ടാമത്തെ മാത്രം ഇന്ത്യന്‍ താരമെന്ന അനുപമ റെക്കോര്‍ഡ് സ്വന്തമാക്കി വെറ്ററന്‍ സ്പിന്നര്‍ ആര്‍ അശ്വിന്‍. മൂന്നാം ക്രിക്കറ്റ് ടെസ്റ്റ് ഇംഗ്ലണ്ട് ഓപ്പണര്‍ സാക് ക്രൗളിയെ പുറത്താക്കിയാണ് അശ്വിന്‍ 500 വിക്കറ്റുകളെന്ന റെക്കോര്‍ഡ് നേട്ടത്തിലെത്തിയത്.
രണ്ടാം ടെസ്റ്റ് അവസാനിക്കുമ്പോള്‍ 499 വിക്കറ്റുകളാണ് അശ്വിനുണ്ടായിരുന്നത്. മൂന്നാം ടെസ്റ്റില്‍ അതിവേഗം മുന്നേറിയ ഇംഗ്ലണ്ടിനു കടിഞ്ഞാണിട്ട് ഇന്ത്യക്ക് ബ്രേക്ക് ത്രൂ നല്‍കിയാണ് അശ്വിന്‍ റെക്കോര്‍ഡ് നേട്ടം തൊട്ടത്. ടെസ്റ്റ് ചരിത്രത്തില്‍ 500 വിക്കറ്റുകള്‍ നേടുന്ന ഒന്‍പതാം ബൗളറായും അശ്വിന്‍ മാറി. ഇന്ത്യന്‍ താരങ്ങളില്‍ ഒന്നാമത് ഇതിഹാസ താരം അനില്‍ കുംബ്ലെയാണ്.
500 വിക്കറ്റുകള്‍ സ്വന്തമാക്കുന്ന ടെസ്റ്റ് ചരിത്രത്തിലെ അഞ്ചാമത്തെ മാത്രം സ്പിന്നറായും അശ്വിന്‍ മാറി. മുത്തയ്യ മുരളീധരന്‍, ഷെയ്ന്‍ വോണ്‍, അനില്‍ കുംബ്ലെ, നതാന്‍ ലിയോണ്‍ എന്നിവരാണ് നേരത്തെ ഈ നേട്ടത്തിലെത്തിയ സ്പിന്നര്‍മാര്‍.
വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍
98ാം ടെസ്റ്റിലാണ് അശ്വിന്‍ 500ല്‍ എത്തിയത്. 2011ലാണ് അശ്വിന്‍ ടെസ്റ്റില്‍ അരങ്ങേറിയത്. 500ല്‍ 347 വിക്കറ്റുകളും നാട്ടിലാണ് അശ്വിന്‍ വീഴ്ത്തിയത്. അതിവേഗത്തില്‍ 500വിക്കറ്റുകള്‍ നേടുന്ന രണ്ടാമത്തെ താരവും അശ്വിന്‍ തന്നെ. മുത്തയ്യ മുരളീധരന്‍ മാത്രമാണ് 100 ടെസ്റ്റുകള്‍ തികയ്ക്കും മുന്‍പ് തന്നെ 500 വിക്കറ്റുകള്‍ വീഴ്ത്തിയ മറ്റൊരു താരം. എലൈറ്റ് പട്ടികയിലെ ഒന്‍പതില്‍ ഏഴ് പേരും 100നു മുകളില്‍ ടെസ്റ്റുകള്‍ക്കു ശേഷമാണ് 500 വിക്കറ്റകള്‍ സ്വന്തമാക്കിയത്.
കരിയറില്‍ 34 അഞ്ച് വിക്കറ്റ് നേട്ടങ്ങള്‍. എട്ട് തവണ 10 വിക്കറ്റ് നേട്ടവും ടെസ്റ്റില്‍ അശ്വിനുണ്ട്.
500 വിക്കറ്റുകള്‍ വീഴ്ത്തിയ ഇതിഹാസങ്ങള്‍
മുത്തയ്യ മുരളീധരന്‍- 800 വിക്കറ്റുകള്‍
ഷെയ്ന്‍ വോണ്‍- 708 വിക്കറ്റുകള്‍
ജെയിംസ് ആന്‍ഡേഴ്‌സന്‍- 695 വിക്കറ്റുകള്‍
അനില്‍ കുംബ്ലെ- 619 വിക്കറ്റുകള്‍
സ്റ്റുവര്‍ട്ട് ബ്രോഡ്- 604 വിക്കറ്റുകള്‍
ഗ്ലെന്‍ മഗ്രാത്ത്- 563 വിക്കറ്റുകള്‍
കോര്‍ട്‌നി വാല്‍ഷ്- 519 വിക്കറ്റുകള്‍
നാതാന്‍ ലിയോണ്‍- 517 വിക്കറ്റുകള്‍
ആര്‍ അശ്വിന്‍- 500 വിക്കറ്റുകള്‍
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
