തൃശൂര്‍: ശബരിമല നിലയ്ക്കലില്‍ സുരക്ഷാ ചുമതലയുണ്ടായിരുന്ന തൃശൂര്‍ എസ്പി യതീഷ് ചന്ദ്രയ്ക്ക് ഹിന്ദു ഐക്യവേദി സംസ്ഥാന അധ്യക്ഷ കെ പി ശശികലയുടെ മകന്‍ വക്കീല്‍ നോട്ടീസയച്ചു. മകനുമായി ചോറൂണിന് പോകുമ്പോള്‍ നിലയ്ക്കലില്‍ വച്ച് തന്നെയും കുടുംബത്തെയും യതീഷ് ചന്ദ്ര അപമാനിച്ചെന്നു ചൂണ്ടിക്കാട്ടിയാണ് നോട്ടീസ്.
കെ പി ശശികലയുടെ മകന്‍ വിജീഷ് ആണ് മാനനഷ്ടക്കേസില്‍ നോട്ടീസ് അയച്ചത്. സംഭവത്തില്‍ മാപ്പു പറയണമെന്നാണ് നോട്ടീസിലെ ആവശ്യം. ഇല്ലാത്ത പക്ഷം മാനനഷ്ടമായി 25 ലക്ഷം രൂപ ആവശ്യപ്പെട്ട് കേസുമായി മുന്നോട്ടുപോവുമെന്ന് നോട്ടീസില്‍ പറയുന്നു. ബിജെപി സംസ്ഥാന അധ്യക്ഷന്‍ പി എസ് ശ്രീധരന്‍ പിള്ളയുടെ അഭിഭാഷക ഓഫീസില്‍ നിന്നാണ് നോട്ടീസ് അയച്ചിരിക്കുന്നത്.
പേരക്കുട്ടിയുടെ ചോറൂണിനായി സന്നിധാനത്തേക്ക് പോകാനെത്തിയ ശശികലയെ യതീഷ് ചന്ദ്രയുടെ നേതൃത്വത്തില്‍ പൊലീസ് സംഘം തടഞ്ഞിരുന്നു. പിന്നീട് സുരക്ഷയുടെ ഭാഗമായി പൊലീസ് മുന്നോട്ട് വയ്ക്കുന്ന നിര്‍ദേശങ്ങള്‍ പാലിക്കാമെന്ന വ്യവസ്ഥയില്‍ ഒപ്പ് വയ്പ്പിച്ച ശേഷം മാത്രമാണ് ശശികലയ്ക്ക് സന്നിധാനത്തേക്ക് പോകാന്‍ അനുമതി നല്‍കിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
