പത്തനംതിട്ട: ശബരിമല കലാപക്കേസില് അറസ്റ്റിലായ രാഹുല് ഈശ്വറിന്റെ ജാമ്യം റാന്നി കോടതി റദ്ദാക്കി. ജാമ്യ വ്യവസ്ഥകള് പാലിക്കാത്തതിനെ തുടര്ന്നാണ് ജാമ്യം റദ്ദാക്കിയത്. രാഹുലിനെ അറസ്റ്റ് ചെയ്യാന് കോടതി ഉത്തരവിട്ടു.
തുലാമാസ പൂജ സമയത്ത് ശബരിമലയില് നടന്ന അക്രമ സംഭവങ്ങളുമായി ബന്ധപ്പെട്ടായിരുന്നു രാഹുലിനെ അറസ്റ്റ് ചെയ്തത്. രണ്ടാഴ്ച കൂടുമ്പോള് അന്വേഷണ ഉദ്യോഗസ്ഥന് മുന്നില് ഹാജരാകണം. കോടതി അനുമതി ഇല്ലാതെ ശബരിമലയില് പ്രവേശിക്കരുത് തുടങ്ങിയ ഒമ്പത് വ്യവസ്ഥകളുടെ പുറത്താണ് കോടതി ജാമ്യം അനുവദിച്ചിരുന്നത്. ഇത് ലംഘിച്ചുവെന്ന് ചൂണ്ടിക്കാട്ടി പത്തനംതിട്ട പൊലീസ് കോടതിയെ സമീപിച്ചതിനെ തുടര്ന്നാണ് ജാമ്യം റദ്ദാക്കിക്കൊണ്ട് കോടതി ഉത്തരവിറക്കിയത്.
എന്നാല് പൊലീസ് വ്യക്തിവിരോധം തീര്ക്കുകയാണെന്നും തിങ്കളാഴ്ച ഹൈക്കോടതിയെ സമീപിക്കുമെന്നും രാഹുല് ഈശ്വര് പ്രതികരിച്ചു. ഏതാനും മണിക്കൂറുകള് താമസിച്ച് പൊലീസ് സ്റ്റേഷനില് ഒപ്പിടാനെത്തിയതാണ് വ്യവസ്ഥ ലംഘിച്ചെന്ന് പൊലീസ് പറയുന്നതെന്ന് രാഹുല് ആരോപിച്ചു. ഡല്ഹിയില് പരിപാടിക്ക് പോയി തിരിച്ച് വന്ന ഫ്ളൈറ്റ് വൈകിയത് കൊണ്ടാണ് ഒപ്പിടാന് കൃത്യസമയത്ത് എത്താന് സാധിക്കാതെ പോയതെന്നും രാഹുല് പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ