തിരുവനന്തപുരം: പാലക്കാട്-പുനലൂർ പാലരുവി എക്സ്പ്രസിന് ഏർപ്പെടുത്തിയിരുന്ന നിയന്ത്രണങ്ങളിൽ ഇളവ്. ജനുവരി ഒന്ന്, മൂന്ന്, നാല്,അഞ്ച് തീയതികളിൽ അറ്റകുറ്റപ്പണികൾ കാരണം പാലരുവി കായംകുളത്ത് യാത്ര അവസാനിപ്പിക്കുമെന്നായിരുന്നു അറിയിച്ചിരുന്നത്. എന്നാൽ ഈ ദിവസങ്ങളിൽ ട്രെയിൻ കായംകുളം-കരുനാഗപ്പള്ളി സെക്ഷനിൽ മൂന്ന് മണിക്കൂർ പിടിച്ചിട്ട ശേഷം യാത്ര തുടരും. ഇന്നു മുതൽ പാലരുവി എക്സ്പ്രസ് തിരുനെൽവേലി വരെ ദീർഘിപ്പിട്ടുണ്ട്.
അതിനിടെ ഷൊർണൂരിൽ സ്റ്റോപ്പ് നിർത്തലാക്കിയ ധൻബാദ്-ആലപ്പുഴ, ആലപ്പുഴ-ധൻബാദ് എക്സ്പ്രസുകൾക്ക് വടക്കാഞ്ചേരി, ഒറ്റപ്പാലം സ്റ്റേഷനുകളിൽ അധിക സ്റ്റോപ്പ് അനുവദിച്ചു. 1.48 ന് വടക്കാഞ്ചേരിയിൽ എത്തുന്ന ധൻബാദ് -ആലപ്പുഴ എക്സ്പ്രസ് (13351) 1.50 ന് യാത്ര തുടരും. വൈകുന്നേരം 3.15 ന് വടക്കാഞ്ചേരിയിലെത്ത ട്രെയിൻ 3.17 ന് യാത്ര പുനരാരംഭിക്കും. രാവിലെ 8.40 ന് വടക്കാഞ്ചേരിയിലെത്തുന്ന ആലപ്പുഴ-ധൻബാദ് എക്സ്പ്രസ് (13352 ) 8.42 ന് യാത്ര പുനരാരംഭിക്കും. ഒറ്റപ്പാലം റെയിൽവേ സ്റ്റേഷനിൽ രാവിലെ 10.16 ന് എത്തി, 10.18 ന് യാത്ര തുടരും. 2018 ഏപ്രിൽ ഒന്നു മുതലാണ് പുതിയ ക്രമീകരണം പ്രാബല്യത്തിൽ വരിക.
തിരുവൈരാണികുളം മഹാദേവക്ഷേത്രത്തിലെ ഉത്സവത്തോടനുബന്ധിച്ച് മൂന്ന് ട്രെയിനുകൾക്ക് ആലുവയിൽ ഡിസംബർ 22 മുതൽ ജനുവരി ഒന്നുവരെ താത്കാലിക സ്റ്റോപ്പ് അനുവദിച്ചതായും റെയിൽവേ അറിയിച്ചു. 12696 തിരുവനന്തപുരം-ചെന്നെ സൂപ്പർ ഫാസ്റ്റ് (രാത്രി 10.05), 12081 കണ്ണൂർ-തിരുവനന്തപുരം ജനശതാബ്ദി (രാവിലെ 9.02), 12082 തിരുവനന്തപുരം -കണ്ണൂർ ജനശതാബ്ദി (വൈകുന്നേരം 7.01) എന്നീ ട്രെയിനുകൾക്കാണ് ഒരു മിനിട്ട് സ്റ്റോപ്പുണ്ടാവുക.
യാത്രക്കാരുടെ തിരക്ക് ശക്തമായി തുടരുന്നതിനാൽ ഹൈദരാബാദ് -തിരുവനന്തപരും ശബരി എക്സ്പ്രസ് (17230), തിരുവനന്തപുരം-ഹൈദരാബാദ് ശബരി എക്സ്പ്രസ് (17229 )എന്നീ ട്രെയിനുകളിൽ ഏർപ്പെടുത്തിയ അധിക കോച്ചുകളുടെ സമയപരിധി ദീർഘിപ്പിച്ചതായും റെയിൽവേ അറിയിച്ചു. ഹൈദ്രാബാദ് -തിരുവനന്തപരും എക്സ്പ്രസിൽ 2019 ജനുവരി ഒന്നുവരെയും തിരുവനന്തപുരം-ഹൈദ്രാബാദ് എക്സ്പ്രസിൽ 04.01.2019 ജനുവരി നാല് വരെയുമാണ് ഒരു സ്ലീപ്പർ കോച്ച് അധികമായുണ്ടാവുക.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ