കൊച്ചി: ബ്യൂട്ടിപാര്‍ലര്‍ വെടിവയ്പിന് പിന്നില്‍ രവി പൂജാര തന്നെയെന്ന് സ്ഥാപനത്തിന്റെ ഉടമയും നടിയുമായ ലീനാ മരിയ പോള്‍. താന്‍ ഇരയാണെന്നും തനിക്കെതിരെ നടക്കുന്നത് കുപ്രചാരണങ്ങളാണെന്നും അവര്‍ പറഞ്ഞു. ഇതിന് മുമ്പ് രണ്ട് തവണ രവി പൂജാര തന്നെ ഭീഷണിപ്പെടുത്തുകയും പണം ആവശ്യപ്പെടുകയും ചെയ്തിട്ടുണ്ടെന്ന് ലീന മരിയാ പോള്‍ പറഞ്ഞു. ബോളിവുഡിലടക്കം രവി നടത്തിയ ഇടപെടലുകളെക്കുറിച്ച് പറഞ്ഞായിരുന്നു ഭീഷണി. ആദ്യം അഞ്ച് കോടി രൂപയും പിന്നീട് 25 കോടി രൂപയും ആവശ്യപ്പെട്ടു. എല്ലാം പൊലീസിനോട് പറയാന്‍ തയ്യാറാണ്. കൊച്ചിയിലെത്തി പൊലീസിനെ കാണുമെന്നും ലീന മരിയ പോള്‍ പറഞ്ഞു.
അതേസമയം, ബ്യൂട്ടിപാര്‍ലറിന് നേരെയുണ്ടായ ആക്രമണം സംബന്ധിച്ച അന്വേഷണം സുദേഷ് ചന്ദ്രശേഖരന്‍ ഉള്‍പെട്ട ഹവാല ഇടപാടുകളിലേക്കാണ് നീങ്ങുന്നതെന്നാണ് സൂചന. മുംബൈ അധോലോകനായകന്‍ രവി പൂജാരയുടെ പേര് ആരോപിക്കുന്നത് അന്വേഷണം വഴിതെറ്റിക്കാന്‍ ആണെന്നും പൊലീസ് പറയുന്നു. ബ്യൂട്ടിപാര്‍ലറിന് സമീപത്ത് നിന്ന് ലഭിച്ച കടലാസ്സില്‍ രവി പൂജാര എന്നെഴുതിയതില്‍ തെറ്റുണ്ടായിരുന്നതായാണ് വിവരം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
