ന്യൂഡല്‍ഹി: ഷൊര്‍ണ്ണൂര്‍ എംഎല്‍എ പി കെ ശശിക്കെതിരെയുളള പീഡന പരാതിയില്‍ ദേശീയ വനിതാ കമ്മീഷന് സ്വമേധയാ കേസെടുത്തു. പരാതിക്കാരിയുടെ മൊഴി രേഖപ്പെടുത്തുമെന്ന് വനിതാ കമ്മീഷന് അധ്യക്ഷ രേഖ ശര്‍മ്മ അറിയിച്ചു.
മണ്ണാര്‍ക്കാട് പാര്‍ട്ടി ഓഫീസില്‍ വച്ച് പി കെ ശശി എംഎല്‍എ തനിക്കതിരെ അതിക്രമത്തിന് ശ്രമിച്ചെന്ന് ഡിവൈഎഫ്‌ഐ വനിതാ നേതാവ് സിപിഎം നേതൃത്വത്തിന് പരാതി നല്‍കിയിരുന്നു. ഇതുസംബന്ധിച്ച് വാര്‍ത്ത മാധ്യമങ്ങള്‍ റിപ്പോര്‍ട്ട് ചെയ്തിരുന്നു. ഇതിന്റെ അടിസ്ഥാനത്തില്‍ സ്വമേധയാ കേസെടുക്കാന്‍ വനിതാ കമ്മീഷന്് അധികാരമുണ്ടെന്ന് രേഖ ശര്‍മ്മ അറിയിച്ചു.
പി കെ ശശി തനിക്കതിരെ അതിക്രമത്തിന് ശ്രമിച്ചെന്ന് വനിതാ നേതാവ് പൊലീസിന് പരാതി നല്‍കിയിട്ടില്ല. ഇക്കാര്യം വനിതാ കമ്മീഷന് അറിയാം. എങ്കിലും പ്രശ്‌നത്തിന്റെ ഗൗരവം ഉള്‍ക്കൊണ്ട് നടപടി സ്വീകരിക്കുകയായിരുന്നു. സംഭവുമായി ബന്ധപ്പെട്ട് അന്വേഷണം ആരംഭിച്ചതായും രേഖ ശര്‍മ്മ അറിയിച്ചു.
കേരളത്തില്‍ അധികാരത്തിലിരിക്കുന്ന പാര്‍ട്ടിയുടെ ജനപ്രതിനിധി എന്ന നിലയില്‍ പി കെ ശശിയില്‍ നിന്നുണ്ടായത് വലിയ കുറ്റമെന്നും രേഖ ശര്‍മ്മ പറഞ്ഞു. അതേസമയം ശശിക്കെതിരായ പീഡനപരാതിയില്‍ സ്വമേധയാ കേസെടുക്കില്ലെന്ന് സംസ്ഥാന വനിതാ കമ്മീഷന് അറിയിച്ചിരുന്നു. യുവതി പരാതി നല്‍കിയാല്‍ അന്വേഷിക്കുമെന്നായിരുന്നു സംസ്ഥാന വനിതാ കമ്മീഷന്റെ നിലപാട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
