തൃശൂര് : മുണ്ടൂരില് ബൈക്കില് പോയ രണ്ടു യുവാക്കളെ പിക്കപ്പ് വാന് ഇടിച്ചു വീഴ്ത്തി വെട്ടിക്കൊലപ്പെടുത്തിയ സംഭവത്തിൽ രണ്ടു പേർ പിടിയിൽ. കഞ്ചാവ് വില്പന എക്സൈസിന് ഒറ്റിക്കൊടുത്തതിന്റെ വൈരാഗ്യമാണ് കൊലയ്ക്കു കാരണമെന്ന് പൊലീസ് പറഞ്ഞു. കേസിലെ ആറ് പ്രതികളെയും തിരിച്ചറിഞ്ഞത് സിസിടിവി ദൃശ്യങ്ങളുടെ അടിസ്ഥാനത്തിലാണ്.
തൃശൂര് മുണ്ടൂര് സ്വദേശിയായ ശ്യാമും വരടിയം സ്വദേശി ക്രിസ്റ്റിയും ബൈക്കില് പോകുമ്പോഴാണ് കഴിഞ്ഞ ദിവസം പുലര്ച്ചെ ആക്രമിക്കപ്പെട്ടത്. പിക്കപ്പ് വാനില് എത്തിയ എതിരാളികള് ഇവരുടെ ബൈക്ക് ഇടിച്ചു വീഴ്ത്തി. പിന്നാലെ, വെട്ടി പരുക്കേല്പിച്ചു. ഇവരെ, സുഹൃത്തുക്കള്തന്നെ മെഡിക്കല് കോളജ് ആശുപത്രിയില് എത്തിച്ചെങ്കിലും രക്ഷിക്കാനായില്ല. കൊല്ലപ്പെട്ടവരുടെ മറ്റൊരു സുഹൃത്ത് ശംഭു എന്ന പ്രസാദിനെയും വണ്ടിയിടിപ്പിച്ച് ഗുരുതരമായി പരുക്കേല്പിച്ചിട്ടുണ്ട്.
വെട്ടിക്കൊന്ന സ്ഥലത്തു നിന്ന് വടിവാള് കണ്ടെടുത്തു. ശംഭു, സിജോയ് എന്നിവരുടെ നേതൃത്വത്തിലുള്ള ക്രിമിനല്സംഘങ്ങള് തമ്മില് പരസ്പരം കുടിപ്പകയുണ്ടായിരുന്നു. കഴിഞ്ഞ ദിവസം സിജോയിയുടെ അനുയായിയെ കഞ്ചാവുമായി എക്സൈസ് പിടികൂടിയിരുന്നു. കഞ്ചാവ് വില്പന ഒറ്റിക്കൊടുത്തത് ശംഭുവിന്റെ സംഘമാണെന്ന് സിജോയിയും തിരിച്ചറിഞ്ഞു. ഇതോടെയാണ് ഇവരെ കൊലപ്പെടുത്തിയത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ