കോതമംഗലം: ചരിത്രത്തിലാദ്യമായി കോതമംഗലം മാര്‍ത്തോമ ചെറിയപളളിയുടെ മൈക്കിലൂടെ ബാങ്ക് വിളി മുഴങ്ങി. ഇതാണ് മതേതര കേരളമെന്ന സന്ദേശം ഉറക്കെ വിളിച്ചു പറഞ്ഞുകൊണ്ട്... പൗരത്വ നിയമഭേദഗതിക്ക് എതിരെ യൂത്ത് കോണ്‍ഗ്രസിന്റെ നേതൃത്വത്തില്‍ നടന്ന സെക്യുലര്‍ മാര്‍ച്ചിന്റെ സമാപന വേദിയായിരുന്നു കോതമംഗലം ചെറിയ പള്ളി. ആയിരങ്ങള്‍ അണിനിരന്ന മാര്ച്ച് നയിച്ചത് പ്രൊഫഷണല്‍ കോണ്‍ഗ്രസ് സംസ്ഥാന പ്രസിഡന്റ് മാത്യു കുഴല്‍നാടന്‍, വി ടി ബല്‍റാം എംഎല്‍എ, പി കെ ഫിറോസ് എന്നിവര്‍.
മൂവാറ്റുപുഴ സെന്‍ട്രല്‍ ജുമാ മസ്ജിദില്‍ നിന്ന് ആരംഭിച്ച മാര്‍ച്ചാണ് ചെറിയ പള്ളിയില്‍ അവസാനിച്ചത്. കോതമംഗലം കെഎസ്ആര്‍ടിസി ജംങ്ഷന് സമീപം നടന്ന പൊതുസമ്മേളനം യൂത്ത് ലീഗ് സംസ്ഥാന പ്രസിഡന്റ് മുന്നവറലി ശിഹാബ് തങ്ങള്‍ ഉദ്ഘാടനം ചെയ്തു. ഒരു ക്രിസ്ത്യന്‍ പള്ളിക്ക് മുന്നില്‍ നിസ്‌കാരം അനുവദിച്ചതും ബാങ്ക് വിളിച്ചതും രാജ്യത്തുതന്നെ ഒരുപക്ഷേ ആദ്യത്തെ സംഭവമായിരിക്കുമെന്ന് അദ്ദേഹം പറഞ്ഞു. മാര്‍ച്ചിന് മുമ്പാണ് ചെറിയ പള്ളിക്ക് മുന്‍പില്‍ മഗ്‌രിബ് നമസ്‌കാരം നടന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
