തിരുവനന്തപുരം : കര്‍ഷക വായ്പകള്‍ക്ക് മോറട്ടോറിയം അനുവദിക്കുന്നതുമായി ബന്ധപ്പെട്ട് സംസ്ഥാന കൃഷി മന്ത്രി വി എസ് സുനില്‍കുമാര്‍ റിസര്‍വ് ബാങ്ക് ഗവര്‍ണറുമായി ചര്‍ച്ച നടത്തും. ആര്‍ബിഐ ഗവര്‍ണറുമായുള്ള കൂടിക്കാഴ്ചയ്ക്ക് മന്ത്രിക്ക് അനുമതി ലഭിച്ചു.
അടുത്തമാസം 10 ന് ഉച്ചയ്ക്ക് 12 നാണ് മന്ത്രി വിഎസ് സുനില്‍കുമാര്‍ ആര്‍ബിഐ ഗവര്‍ണര്‍ ശക്തികാന്ത ദാസുമായി ചര്‍ച്ച നടത്തുക. കേരളത്തിലെ പ്രത്യേക സാഹചര്യം കണക്കിലെടുത്ത് കര്‍ഷക വായ്പകള്‍ക്ക് മോറട്ടോറിയം നീട്ടണമെന്ന സര്‍ക്കാര്‍ നിലപാട് മന്ത്രി ആര്‍ബിഐ ഗവര്‍ണര്‍ക്ക് മുമ്പാകെ വെക്കും.
നേരത്തെ കേരളത്തിലെ കര്‍ഷക വായ്പകള്‍ക്ക് മോറട്ടോറിയം നീട്ടാനാകില്ലെന്ന ആര്‍ബിഐ തീരുമാനം ഏറെ പ്രതിഷേധത്തിന് ഇടയാക്കിയിരുന്നു. തുടര്‍ന്ന് കഴിഞ്ഞ ബുധനാഴ്ച മുഖ്യമന്ത്രി സംസ്ഥാന തല ബാങ്കേഴ്‌സ് സമിതി യോഗം വിളിച്ചുകൂട്ടിയിരുന്നു. കര്‍ഷകരെ കടക്കെണിയിലാക്കുന്ന നടപടിയിലേക്ക് തള്ളിവിടാന്‍ ഒരുക്കമെല്ലെന്ന് യോഗത്തില്‍ സര്‍ക്കാര്‍ വ്യക്തമാക്കുകയും ചെയ്തിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
