പൊലീസിന് താക്കീതുമായി മാവോവാദികളുടെ പോസ്റ്റര്‍; ജലീലിനെ കൊന്നവര്‍ക്ക് തിരിച്ചടി നല്‍കുമെന്ന് ഭീഷണി
കാളികാവ്: പൊലീസിന് താക്കീതുമായി കോഴിക്കോട് തിരുവമ്പാടിയില്‍ മാവോവാദികളുടെ പോസ്റ്റര്‍. സി.പി.ജലീലിന്റെ മരണത്തില്‍ ഉത്തരവാദികളായ പൊലീസുകാര്‍ക്ക് ഉചിതമായ സമയത്ത് തിരിച്ചടി നല്‍കുമെന്നാണ് പോസ്റ്ററില്‍ പറയുന്നത്.
സി.പി.ജലീലിനെതിരെ പ്രകോപനമില്ലാതെയാണ് പൊലീസ് വെടിയുതിര്‍ത്തത്. പാര്‍ട്ടി ഫണ്ട് സമാഹരണത്തിന് എത്തിയതായിരുന്നു ജലീല്‍ എന്നും പോസ്റ്ററില്‍ പറയുന്നു. പൊലീസ് കര്‍ശന നിരീക്ഷണം ഏര്‍പ്പെടുത്തിയതിന് മറികടന്നാണ് മാവോവാദികള്‍ വീണ്ടും പോസ്റ്റര്‍ പതിച്ചിരിക്കുന്നത്. വയനാട് കേന്ദ്രീകരിച്ച് പ്രവര്‍ത്തിക്കുന്ന കബനി ദളത്തിന് കീഴിലെ പ്രവര്‍ത്തകരാണ് പോസ്റ്റര്‍ പതിപ്പിക്കാന്‍ എത്തിയത്. കൂടുതല്‍ പുതുമുഖങ്ങള്‍ മാവോവാദി സംഘങ്ങളിലേക്ക് എത്തിയതായും സൂചനയുണ്ട്.
തൊവരിമല ഭൂസമരത്തിനും മാവോവാദികള്‍ പിന്തുണ പ്രഖ്യാപിച്ചിട്ടുണ്ട്. സിപിഐഎം റെഡ് ഫഌഗ് പ്രവര്‍ത്തകരാണ് വയനാട് ബത്തേരിയില്‍ നടക്കുന്ന തൊവരിമല ഭൂസമരം നയിക്കുന്നത്. പ്രത്യക്ഷ സമരം ഇവിടെ നടക്കുന്നില്ലെങ്കിലും റെഡ് ഫഌഗ് പ്രവര്‍ത്തകര്‍ സമരം തുടരുന്നുണ്ടെന്നാണ് പറയുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
