തിരുവനന്തപുരം : ജനക്കൂട്ടം പിടിച്ചുനല്കുന്ന പ്രതികളെ നേരിട്ട് പൊലീസ് സ്റ്റേഷനുകളിലേക്ക് കൊണ്ടുപോകരുതെന്ന് പൊലീസുകാര്ക്ക് നിര്ദേശം. വൈദ്യപരിശോധന നടത്തി ആരോഗ്യമുണ്ടെന്ന് ഉറപ്പാക്കിയശേഷം മാത്രമേ സ്റ്റേഷനിലേക്ക് കൊണ്ടുപോകാവൂ. ഇതുസംബന്ധിച്ച ഉന്നത ഉദ്യോഗസ്ഥരുടെ വാക്കാലുള്ള നിര്ദേശം സ്റ്റേഷനുകളില് ലഭിച്ചു. നെടുങ്കണ്ടം കസ്റ്റഡി മരണത്തെത്തുടര്ന്നാണ് നടപടി.
സ്റ്റേഷന് ലോക്കപ്പിലുള്ള പ്രതികളുടെ വിവരങ്ങള് ഉടന് ജില്ലാ പൊലീസ് മേധാവിയെ അറിയിക്കണം. അതീവ ഗുരുതര കേസുകളിലൊഴികെ രാത്രികാല കസ്റ്റഡി ഒഴിവാക്കണം. മദ്യപിച്ച് ഡ്രൈവിംഗ് ഉള്പ്പെടെയുള്ള സംഭവങ്ങളിലും മറ്റും ഉത്തരവാദികളെ നേരെ ആശുപത്രികളിലേക്ക് കൊണ്ടുപോകണം. അടിപിടി കേസുകളില് പ്രതികളെ രാത്രി കസ്റ്റഡിയില് എടുക്കേണ്ടെന്നും നിര്ദേശം നല്കിയിട്ടുണ്ട്.
രാത്രി കഴിയുന്നതും പൊലീസ് ലോക്കപ്പ് ഒഴിച്ചിടാനാണ് നിര്ദേശം നല്കിയിട്ടുള്ളത്. പൊലീസ് കൈകാണിച്ചിട്ടും വാഹനം നിര്ത്താതെ പോകുന്ന സംഭവങ്ങളില്, പിന്തുടര്ന്ന് പിടികൂടേണ്ടെന്നും സുരക്ഷിത നടപടികള്ക്ക് പ്രാമുഖ്യം നല്കണമെന്നും നിര്ദേശം നല്കിയിട്ടുണ്ട്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ