തിരുവനന്തപുരം: പ്രളയം ആഞ്ഞടിച്ചതിന്റെ ഫലമായി കേരളം കടുത്ത സാമ്പത്തിക പ്രതിസന്ധിയിലായിരുന്നു. ഇതിനെ തുടർന്നാണ് പുതിയ വാഹനങ്ങൾ വാങ്ങുന്നതിൽ നിയന്ത്രണം ഏർപ്പെടുത്താൻ ധനമന്ത്രി തോമസ് ഐസക് ഉത്തരവിട്ടത്. എന്നാൽ ധനവകുപ്പ് തന്നെ മന്ത്രിയുടെ ഉത്തരവ് തെറ്റിച്ചിരിക്കുകയാണ്. പുതിയ 12 എസി ബൊലേറോ ജീപ്പുകളാണ് ധനവകുപ്പ് വാങ്ങിയത്. 96 ലക്ഷമാണ് വാഹനങ്ങൾ വാങ്ങാനായി ചെലവാക്കിയിരിക്കുന്നത്.
നാല്പതിനായിരം മുതൽ എഴുപതിനായിരം കിലോ മീറ്റർ മാത്രം ഓടിയ വണ്ടികൾക്ക് പകരമാണ് പുതിയ വാഹനങ്ങൾ വാങ്ങിയത്. നിയമസഭയിൽ ധനമന്ത്രി നൽകിയ ഉത്തരത്തിലാണ് വിവരങ്ങളുള്ളത്. ധനവകുപ്പിന് കീഴിലെ ധനകാര്യപരിശോധന വിഭാഗമാണ് മന്ത്രിയുടെ നിർദേശം കാറ്റിൽ പറത്തിയത്.
ധനകാര്യ പരിശോധനാ വിഭാഗത്തിന് നിലവിലുള്ള ഓൾട്ടോ കാറിൽ പരിശോധനക്കായി കൂടുതൽ ജീവനക്കാർക്ക് പോകാനുള്ള ബുദ്ധിമുട്ടാണ് പുതിയ വാഹനം വാങ്ങാനുള്ള ഒരു കാരണമായി പറയുന്നത്. 12 ജില്ലകളിലെ വാഹനങ്ങളിൽ എസി ഇല്ലാത്തതിനാൽ മഴക്കാലത്ത് സുരക്ഷാ ഭീഷണിയുണ്ടെന്നും മറുപടിയിലുണ്ട്.
സാമ്പത്തിക പ്രതിസന്ധി മൂലം മുണ്ട് മുറുക്കി ഉടുക്കണമെന്നാണ് ധനവകുപ്പ് നിർദ്ദേശം. വകുപ്പ് മേധാവികൾ മാത്രമേ പുതിയ വാഹനം വാങ്ങാവൂ എന്ന കർശന നിർദ്ദേശവുമുണ്ട്. വിവിധ വകുപ്പുകളും സ്ഥാപനങ്ങളും പുതിയ വാഹനം വാങ്ങാതെ അപേക്ഷ ക്ഷണിച്ച് മൂന്ന് മുതൽ അഞ്ച് വർഷത്തേക്ക് കരാർ അടിസ്ഥാനത്തിൽ വാഹനം എടുക്കണമെന്നായിരുന്നു നിർദ്ദേശം. ധനവകുപ്പ് പുതിയ വണ്ടികൾ വാങ്ങിയതോടെ കൂടുതൽ വകുപ്പുകൾ വണ്ടികൾ വാങ്ങാൻ അപേക്ഷ നൽകാനുള്ള സാധ്യതയുമുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
