കല്യോട്ടെ കുടുംബങ്ങളെ ആശ്വസിപ്പിക്കാൻ രാഹുലെത്തും; വീരമൃത്യു വരിച്ച വസന്ത്കുമാറിന്റെ വീടും സന്ദർശിക്കും

കാസർകോട്: എഐസിസി അധ്യക്ഷൻ രാഹുൽ ഗാന്ധി പെരിയയിലെ കല്യോട്ടെത്തുന്നു. കൊല്ലപ്പെട്ട യൂത്ത് കോൺ​ഗ്രസ് പ്രവർത്തകരായ കൃപേഷിന്റേയും ശരത് ലാലിന്റേയും വീടുകൾ രാഹുൽ ​ഗാന്ധി സന്ദർശിക്കും. ഈ മാസം 12നു കല്യോട്ടെത്തുമെന്നാണു കെപിസിസിക്കു ലഭിച്ച വിവരമെന്ന് പ്രസിഡന്റ് മുല്ലപ്പള്ളി രാമചന്ദ്രൻ അറിയിച്ചു. മംഗളൂരു വിമാനത്താവളം വഴി കാസർകോട് എത്തുന്ന അദ്ദേഹത്തിന്റെ സന്ദർശനത്തിന്റെ കൂടുതൽ വിവരങ്ങൾ ലഭ്യമായിട്ടില്ലെന്ന് അദ്ദേഹം പറഞ്ഞു.

കൃപേഷിന്റെയും ശരത്​ലാലിന്റെയും വീട് സന്ദർശിച്ച ശേഷം അദ്ദേഹം വയനാട്ടിലെത്തും. വീരമൃത്യു വരിച്ച സിആർപിഎഫ് ഹവിൽദാർ വിവി വസന്ത്കുമാറിന്റെ ലക്കിടിയിലെ വസതിയിലെത്തി കുടുംബാംഗങ്ങളെ സന്ദർശിക്കും. തുടർന്ന് കോഴിക്കോട് കോൺഗ്രസ് കമ്മിറ്റി സംഘടിപ്പിക്കുന്ന റാലിയിലും പങ്കെടുക്കും.