തിരുവനന്തപുരം: രാഹുല് ഗാന്ധി വയനാട്ടില് നിന്ന് പരാജയപ്പെട്ടാല് രമേശ് ചെന്നിത്തലയുടെയും ഉമ്മന് ചാണ്ടിയുടെയും രാഷ്ട്രീയ അന്ത്യമാകുമെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. വയനാട്ടിലേക്ക് രാഹുല് മത്സരിക്കുവാനെത്തുന്നത് കോണ്ഗ്രസിന്റെ ആത്മവിശ്വാസം നഷ്ടപ്പെട്ടു എന്നതിന്റെ തെളിവാണ്.രാഷ്ട്രീയ പ്രബുദ്ധതയുള്ള മണ്ഡലമാണ് വയനാട്. അവിടെ രാഹുല് ഗാന്ധി സ്ഥാനാര്ത്ഥിയാവുന്നത് എല് ഡി എഫില് യാതൊരു വിഹ്വലതയും ഉണ്ടാക്കില്ലെന്ന് കോടിയേരി പറഞ്ഞു.
അമേഠി സുരക്ഷിതമല്ലെന്ന് രാഹുല് മനസിലാക്കിയിരിക്കുന്നു. പരാജയഭീതിയില്നിന്നുണ്ടായ തീരുമാനമാണ് വയനാട്ടിലേക്കുള്ള വരവ്. യു പിയില് തോല്വി സമ്മതിച്ചാണ് രാഹുല് ഗാന്ധി കേരളത്തിലേക്ക് വരുന്നത്. ഇത്തവണ എല്ഡിഎഫിന് നല്ല വിജയപ്രതീക്ഷയുള്ള മണ്ഡലമാണ് വയനാട്. ആത്മവിശ്വാസത്തോടെ എല്ഡിഎഫ് തിരഞ്ഞെടുപ്പിനെ നേരിടുമെന്നും കോടിയേരി പറഞ്ഞു.
ഇത്രയും ദിവസം ടി സിദ്ദിഖിന് വേണ്ടി ഉമ്മന് ചാണ്ടിയും ഐ ഗ്രൂപ്പ് പ്രതിനിധികള്ക്ക് വേണ്ടി രമേശ് ചെന്നിത്തലയും വയനാടിനായി കടിപിടി കൂടുകയായിരുന്നു. ഈ സാഹചര്യത്തിലാണ് രാഹുല് അവിടെ സ്ഥാനാര്ഥിയാകാന് തീരുമാനിച്ചത്.
ഈ തീരുമാനം ഉമ്മന്ചാണ്ടിക്കേറ്റ കനത്ത പ്രഹരം കൂടിയാണ്. എ ഗ്രൂപ്പിനു വേണ്ടി ഉമ്മന്ചാണ്ടി മണ്ഡലം ഉറപ്പിക്കുകയും ടി സിദ്ദിഖ് പ്രചാരണം ആരംഭിക്കുകയും ചെയ്തിരുന്നു. എന്നാല് അസംതൃപ്തിയുള്ള ഐ ഗ്രൂപ്പുകാര് ഇതിനെതിരെ നിലപാടെടുത്തു. ഐ ഗ്രൂപ്പ് രഹസ്യ യോഗം ചേര്ന്ന് സിദ്ധിഖിനെതിരെ പ്രവര്ത്തിക്കാന് തീരുമാനിച്ചു. ഈ ഘട്ടത്തില് കെ സി വേണുഗോപാല് ഇടപെടുകയായിരുന്നു. വേണുഗോപാലാണ് ഈ തീരുമാനത്തില് സമ്മര്ദ്ദശക്തിയായതെന്നും കോടിയേരി പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ