മുംബൈ: കൊറോണ വൈറസ് ബാധ പടരുന്ന സാഹചര്യത്തിൽ ട്രെയിനുകളിലെ എസി കോച്ചുകളിൽ കമ്പിളി നൽകില്ലെന്ന് റെയിൽവെ. ആവശ്യമുള്ളവർ സ്വന്തമായി കൊണ്ടുവരണം. കർട്ടനുകളും നീക്കുമെന്ന് റെയിൽവെ അറിയിച്ചു. എല്ലാ ദിവസം ഇത് കഴുകി ഉപയോഗിക്കാൻ കഴിയാത്തതിനാലാണ് ഒഴിവാക്കുന്നത്.
അതേസമയം, ബെഡ് ഷീറ്റ്, ടവലുകൾ, തലയിണ കവറുകൾ എന്നിവ ദിവസവും കഴുകി ഉപയോഗിക്കുമെന്നും റെയിൽവേ അറിയിച്ചു. നിലവിൽ കർട്ടനുകളും ബ്ലാങ്കറ്റുകളും ദിവസം കഴുകി ഉപയോഗിക്കാനുള്ള സൗകര്യം റെയിൽവേയിലില്ല. ഇതിനാൽ ഇവ പെട്ടെന്ന് പിൻവലിക്കാൻ തീരുമാനിക്കുകയാണ്. യാത്രക്കാർക്ക് ആവശ്യമെങ്കിൽ കമ്പിളികൾ കൊണ്ടു വരാം. അധിക ബെഡ്ഷീറ്റുകൾ ആവശ്യമുള്ളവർക്ക് അത് നൽകുമെന്ന് റെയിൽവേ അറിയിച്ചു. തേജസ് എക്സ്പ്രസിലും അടുത്ത നാല് ദിവസത്തേക്ക് കർട്ടനുകളുണ്ടാവില്ലെന്ന് റെയിൽവെ അറിയിച്ചു.
ട്രെയിനിലെ ഗ്രാബ് ഹാൻഡിൽസ്, ഡോർ ഹാൻഡിൽസ്, ഡോർ ലാച്ചസ്, എൻട്രി ഡോർ ഹാൻഡിൽ, സീറ്റ് ഗാർഡ്, സ്നാക് ട്രേ, വിൻഡോ ഗ്ലാസ്, വിൻഡോ ഗ്രിൽ, ബോട്ടിൽ ഹോൾഡർ, അപ്പർ ബെർത്ത് ക്ലൈംബിങ് സ്റ്റെയർ, ഇലക്ട്രിക് സ്വിച്ച്, ചാർജ് പോയിൻറ് എന്നിവയെല്ലാം അണുവിമുക്തമാക്കുമെന്നും റെയിൽവേ അറിയിച്ചു
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ